صدرمملکت عارف علوی نے یادگارِ شہدا کا افتتاح کردیا

تفصیلات کے مطابق مظفرآباد میں یوم یکجہتی کشمیر سے متعلق تقریب منعقد ہوئی جس کے مہمان خصوصی صدر مملکت ڈاکٹر عارف علوی تھے جبکہ تقریب میں چیف آف آرمی اسٹاف جنرل قمر جاوید باجوہ، صدر آزاد کشمیر بیرسٹر سلطان محمود چوہدری،  وزیر اعظم سردار عبدالقیوم نیازی، پارلیمانی کشمیر کمیٹی کے چیئرمین شہریار خان آفریدی، اپوزیشن رہنماؤں سمیت دیگر نے شرکت کی۔

یادگار کشمیر میں شہدا کے نام کنندہ ہیں اور شہدا کی قربانیوں کو احسن انداز میں اجاگر کیا گیا ہے۔ یادگار شہدا تحریک آزادی کشمیر میں جانوں کا نذرانہ پیش کرنے کرنے والوں کو خراج عقیدت پیش کرنے کے لیے تعمیر کی گئی ہے۔

اس موقع پر تقریب سے خطاب کرتے ہوئے صدر مملکت ڈاکٹر عارف علوی نے کہا کہ کہ آج کا دن بتا رہا ہے کہ مقبوضہ کشمیر میں کیا ہو رہا ہے، مسلمانوں نے بھارت کے ساتھ رہنے کی کوشش کی تاہم 2 قومی نظریے میں واضح کیا گیا کہ دونوں قومیں ایک ساتھ نہیں رہ سکتیں۔

انہوں نے کہا کہ بھارت ہر روز دو قومی نظریے کو سچ ثابت کر رہا ہے۔ بھارت نے خواتین کے ساتھ جبری زیادتیوں کو ہتھیار بنایا اور بھارت کی سوچ انتہا پسندانہ ہے۔ باحجاب خواتین کو تعلیمی اداروں سے نکالا جا رہا ہے۔ صدر مملکت نے کہا کہ جدوجہد کا اصول ہے ہم ہر واقعہ یاد رکھیں گے۔ بھارت خود کو سیکولر کہتا ہے لیکن حقیقت میں وہ انتہا پسند سوچ رکھتا ہے۔

اس موقع پر وزیراعظم آزاد کشمیر عبدالقیوم نیازی نے  کہا کہ یاد گارشہدا کی تقریب میں شرکت میرے لیے اعزاز ہے، آزادی کے مطالبےکی قیمت کشمیریوں نے جانیں قربان کر کے چکائی، زندہ قومیں شہدا کی قربانیوں کو ہمیشہ یاد رکھتی ہیں۔

وزیراعظم آزادکشمیر کاکہنا تھا کہ کشمیر کی تاریخ قربانیوں سے بھری پڑی ہے، سید علی گیلانی نے کہا ہم پاکستانی ہیں، پاکستان ہمارا ہے، سید علی گیلانی کےاس نعرے نے کشمیروں کو نیا حوصلہ دیا۔ کشمیر کے پاکستان کیساتھ رشتے کو کسی قیمت کمزور نہیں ہونے دینگے۔

انہوں نے کہا کہ لائن آف کنٹرول پر جنگ کبھی نہیں رکی،ایل او سی پر بسنےوالا ہر شہری غازی ہے، جدوجہد آزادی کو کسی بھی قیمت پر ٹھنڈا نہیں پڑنے دیں گے۔

خیال رہے کہ آج پاکستان سمیت دنیا بھر میں کشمیریوں سے اظہار یکجہتی کا دن منایا جا رہا ہے۔