خاتون کے سر میں کیل ٹھوکنے کا تعلق جعلی عامل سے نہیں: شوہر کا انکشاف

تفصیلات کے مطابق خاتون کے شوہر نے کہا کہ اس کی بیوی نے کسی علاج کے عقیدے کے تحت سر میں کیل نہیں ٹھکوائی تھی۔

چند روز قبل لیڈی ریڈنگ ہسپتال میں خاتون کے سر سے کیل نکال دی گئی تھی، تاہم ہسپتال سے واقعے کی خبر سوشل میڈیا پر وائرل ہونے پر پولیس نے معاملے کی تحقیقات کا آغاز کیا تھا۔

سوشل میڈیا پر نشر ہونے والی خبر میں الزام لگایا گیا تھا کہ جعلی عامل نے بیٹے کی پیدائش کے لیے خاتون سے سر میں کیل ٹھوکنے کے لیے کہا تھا، تاہم اس کے افغان شوہر احمد صابر نے میڈیا سے گفتگو کرتے ہوئے مبینہ عقیدے کا دعویٰ مسترد کیا ہے۔

خاتون کے شوہر نے دعویٰ کیا کہ اس کی اہلیہ کافی عرصہ سے ذہنی بیماری میں مبتلا ہے اور ماہرنفسیات اس کا علاج بھی کر رہے ہیں۔

احمد صابر نے بیٹے کی خواہش سے انکار کرتے ہوئے کہاکہ اس کی 2 بیویاں اور 11 بچے ہیں جن میں 6 لڑکے شامل ہیں۔

ایک سوال کے جواب پر صابر احمد کا کہنا تھا کہ میڈیا اداروں نے خاندان سے تصدیق کیے بغیر خبر نشر کی۔

انہوں نے کہا کہ واقعے کا جعلی عامل یا بیٹے کی خواہش سے کوئی تعلق نہیں ہے ’آپ لوگ یقین نہیں کریں گے لیکن میری بیوی ارواح کے قبضےمیں ہے‘۔

ان کا کہنا تھا کہ خاتون اس کی دوسری اہلیہ ہیں اور ان کی شادی 2012 میں ہوئی تھی، اس کے 2 بیٹوں سمیت 3 بچے ہیں، جبکہ پہلی بیوی کے 8 بچے ہیں جس میں 4 بیٹے اور 4 بیٹیاں شامل ہیں۔

صابر احمد نے کہا کہ ماضی میں بھی اس کی اہلیہ نے گھر کی تیسری منزل سے چھلانگ لگا کر خود کشی کرنے کی کوشش کی تھی۔

اس موقع پر ایس ایس پی ہارون رشید کا کہنا تھا کہ پولیس نے خاتون کے سر میں کیل ٹھوکنے سے متعلق تحقیقات کے دوران خاندان سے تفتیش کی گئی ممکنہ طور پر یہ کسی حادثے کا نتیجہ ہے، پولیس نے ماہر نفسیات سے خاتون کا معائنہ کروانے کا منصوبہ بنایا ہے۔

ایس ایس پی نے کہا کہ خاتون نے تفتیشی حکام کو بتایا ہے کہ وہ اپنے حواس کھو بیٹھی تھی ہوش میں آنے پر اس نے دیکھا کہ اس کے سر میں کیل ہے۔

ان کا کہنا تھا کہ پولیس خاتون کے شوہر کا فون کالز ریکارڈ بھی چیک کر رہی ہے، اس کا شوہر واقعے کے وقت گھر میں موجود نہیں تھا۔

یاد رہے چند روز قبل جب خاتون لیڈی ریڈنگ ہسپتال لاہور پہنچی تھیں تو ان کے سر سے خون بہہ رہا تھا اور ڈاکٹرز نے دیکھا کہ اس کے سر میں کیل ٹھوکی ہوئی ہے تاہم ڈاکٹرز کی علاج کرتے ہوئے کیل نکال دی تھی۔