برطانیہ میں شدید طوفان کے باعث  ریڈ وارننگ جاری 

برطانوی میڈیا کے مطابق لندن میں طوفان یونیس کے باعث ریڈ وارننگ جاری کرتے ہوئے لوگوں کو گھروں میں رہنے کی ہدایت کی گئی ہے ۔ اس دوران 100 میل فی گھنٹہ رفتار سے ہوائیں چلنے کا امکان ہے ۔  حکام کی جانب سے اسکولز بند کردیے گئے جبکہ ٹرانسپورٹ کا نظام بھی معطل ہوا ہے ۔ 

برطانوی محکمہ موسمیات کی جانب سے ساؤتھ ویسٹ انگلینڈ اور ساؤتھ ویلز میں جمعہ کے روز خطرناک موسم کے سبب "ریڈ وارننگ"  جاری کردی گئی ہے، شدید خراب موسم کی صورت حال پر غور کے لیے حکومت نے کوبرا میٹنگ بھی طلب کرلی ہے ۔ برطانوی محکمہ موسمیات کے مطابق   100 میل فی گھنٹہ کی رفتار سے چلنے والی ہواؤں کے سبب اڑ کر گرنے والی اشیا  انسانی جانوں کے لیے خطرہ بن سکتی ہیں۔

یاد  رہے کہ برطانیہ میں ایک  ہفتے میں یہ دوسرا طوفان ہے ،  پہلے طوفان ڈڈلی کے سبب ملک کے مختلف حصوں میں مسافروں کو شدید مشکلات ہیں اور ہزاروں گھر بجلی سے محروم ہیں ، طوفان کے باعث کمبریا، نارتھ یارکشائر اور لنکا شائر میں 14 ہزار گھر بجلی سے محروم ہوئے۔

اسکاٹ لینڈ میں بدھ کی شام سے متاثر ٹرین سروس کی بحالی کے لیے ٹریکس کی صفائی کا عمل جاری ہے ۔ جبکہ جمعہ کو ویلز اور انگلینڈ کو ایک اور طوفان یونیس کا سامنا ہوگا ۔  محکمہ موسمیات نے جمعہ کو پورے انگلینڈ کے لیے ایمبر وارننگ  جاری کردی ہے جس کا مطلب ہے کہ طوفان زندگی کے لیے خطرہ ہے۔

اس  حوالے سے وزیر اعظم بورس جانسن کا کہنا ہے کہ برطانوی فوج امدادی کاموں کے لیے تیار ہے ۔ طوفان کے باعث  کئی پروازیں بھی منسوخ کردی گئیں ہیں جن میں برلن برانڈنبرگ ہوائی اڈہ اور جرمنی کے سب سے بڑے ہوائی اڈے  فرینکفرٹ  شامل ہے۔