کراچی: ڈیفنس میں جنازے کے دوران فائرنگ، سینئر وکیل خواجہ شمس الاسلام جاں بحق،بیٹا زخمی

کرا چی : شہر قائد کے علاقے ڈیفنس میںجنازے کے دوران فائرنگ سے سینئر وکیل خواجہ شمس الاسلا م جاں بحق ہو گئے ،فائرنگ کے واقعے میں ان کا بیٹا زخمی ہو گیا۔

میڈیا رپوٹ کے مطابق یہ افسوسناک واقعہ کراچی میںڈیفنس فیز 6 میں پیش آیا جہاںایک نمازہ جنازہ کے دوران نا معلوم افراد نے فائرنگ کر دی جس کے نتیجے میں خواجہ شمس السلام اور ان کے بیٹے سمیت 3 افراد زخمی ہوگئے تھے، جنہیں نجی ہسپتال منتقل کیا گیا تھا، جہاں خواجہ شمس الاسلام زخموں کی تاب نہ لاتے ہوئے دم توڑ گئے، انہیں 3 گولیاں لگی تھیں۔

واقعے کے بعد پولیس کی نفری جائے وقوعہ پر پہنچ گئی جبکہ زخمیوں کو ہسپتال منتقل کردیا گیاہے،پولیس حکام کا کہنا ہے کہ واقعے کی تحقیقات کی جارہی ہیں۔

پولیس کا کہنا ہےکہ شمس الاسلام پر گزشتہ سال بھی حملہ ہوا تھا، جس میں ان کے کاندھے پر گولی لگی تھی۔

ذرائع کے مطابق خواجہ شمس الاسلام متعدد ہائی پروفائل کیسز کی پیروی کر رہے تھے، وہ سول اور کرمنل کیسز کے معروف وکیل تھے، وہ زمینی تنازعات کے ماہر وکیل جانے جاتے تھے، ان کے خلاف ڈیفنس کے علاقے میں پولیس سےجھگڑے پر ایف آئی آر بھی درج ہوئی تھی۔