پاک بھارت 7 مئی کی فضائی جھڑپ:پاک فضائیہ کی کارروائی کی تفصیلات جاری

برطانوی خبر رساں ادارے رائٹرز نے پاکستان کی جانب سے بھارت کے جدید لڑاکا طیارے کو مار گرانے سے متعلق ایک تفصیلی رپورٹ جاری کی ہے۔

رپورٹ کے مطابق بھارتی رافیل طیارے کی تباہی کی ایک اہم وجہ چینی ساختہ پی ایل-15 میزائل سے متعلق بھارتی انٹیلی جنس کی ناکامی بنی۔ واقعے نے مغربی ساختہ جنگی ہتھیاروں کی کارکردگی پر سنجیدہ سوالات اٹھا دیے ہیں۔

رائٹرز کی رپورٹ میں کہا گیا ہے کہ 7 مئی کی رات پاک فضائیہ کے ریڈار پر بھارتی فضائیہ کے درجنوں طیاروں کی نقل و حرکت دیکھی گئی، جس کے بعد پاک فضائیہ کے سربراہ ائیرچیف مارشل ظہیر احمد بابر سدھو، جو پہلے سے آپریشن روم میں موجود تھے، نے فوری طور پر چینی ساختہ جے-10 سی طیارے تعینات کرنے کا حکم دیا۔ ائیرچیف نے رافیل طیاروں کو نشانہ بنانے کی خصوصی ہدایت بھی دی۔

رپورٹ میں مزید بتایا گیا ہے کہ اس فضائی جھڑپ میں پاکستان اور بھارت کے مجموعی طور پر 110 سے زائد طیاروں نے حصہ لیا، جسے ماہرین گزشتہ دہائیوں کی سب سے بڑی فضائی جھڑپ قرار دے رہے ہیں۔

رائٹرز کے مطابق پاکستان نے اس جھڑپ میں کامیاب الیکٹرانک وارفیئر حملے کا دعویٰ کیا، جس نے دشمن کے نظام کو مؤثر طریقے سے مفلوج کیا۔ اس کے بعد کئی ممالک کی جانب سے چینی لڑاکا طیاروں، خصوصاً جے-10 سی، میں دلچسپی بڑھ گئی ہے۔

ادھر بھارتی رکن پارلیمنٹ امریندر سنگھ نے لوک سبھا اجلاس میں رافیل طیارے کی تباہی کے شواہد پیش کیے، تاہم بھارتی حکومت کی جانب سے اب تک کوئی باضابطہ ردعمل سامنے نہیں آیا۔