اداکارہ رمیا کو آن لائن ریپ اور قتل کی دھمکیاں، دو افراد گرفتار

بھارتی اداکارہ اور سابق رکنِ لوک سبھا دیویا اسپاندانہ المعروف رمیا کو آن لائن ریپ اور قتل کی دھمکیاں دینے کے الزام میں دو افراد کو گرفتار کر لیا گیا۔

بھارتی میڈیا کے مطابق اداکارہ نے حالیہ دنوں میں بینگلورو پولیس کو ایک درخواست دی تھی جس میں انہوں نے بتایا کہ انہیں سوشل میڈیا پر 43 مختلف اکاؤنٹس سے سنگین نوعیت کی دھمکیاں دی جا رہی ہیں۔

رپورٹس کے مطابق یہ دھمکیاں اس وقت شروع ہوئیں جب اداکارہ نے ایک مداح کے قتل کے الزام میں گرفتار مشہور کنڑا اداکار درشن کے کیس پر تبصرہ کیا۔ اس کے بعد درشن کے حامیوں نے انہیں تنقید کا نشانہ بنانا شروع کر دیا۔

اداکارہ کی شکایت پر پولیس کے سائبر کرائم وِنگ نے تحقیقات شروع کیں اور کئی سوشل میڈیا اکاؤنٹس کی شناخت کی جو نفرت انگیز اور دھمکی آمیز مواد پھیلا رہے تھے۔

پولیس کے مطابق دو افراد کو حراست میں لیا گیا ہے، جنہوں نے دورانِ تفتیش جرم کا اعتراف بھی کر لیا ہے۔ مزید 11 سوشل میڈیا اکاؤنٹس کی شناخت بھی ہو چکی ہے، جس کے بعد کل مشتبہ اکاؤنٹس کی تعداد 48 سے تجاوز کر گئی ہے۔

واضح رہے کہ دیویا اسپاندانہ (رمیا) کنڑا فلم انڈسٹری کی مشہور اداکارہ ہیں۔ وہ کافی عرصے تک فلمی دنیا سے دور رہنے کے بعد 2023 میں دوبارہ فلموں میں جلوہ گر ہوئی تھیں۔