اے این ایف  کی لاہور ائر پورٹ پر کارروائی ، منشیات برآمد 

تفصیلات کے مطابق لاہور ائیرپورٹ پر دوران تلاشی مسافر سے منشیات برآمد کی گئی ، ملزم نے ہیروئین بھرے کیپسول پیٹ میں چھپائے ہوئے تھے۔ 

ترجمان اے این ایف نے کہا کہ ملزم نائجیریا کا رہائشی ہے جو لاہور سے نائجیریا بذریعہ قطر ایئرلاین جا رہا تھا۔  ترجمان نے مزید بتایا کہ ملزم کو حراست میں لے کر تفتیش جاری ہے ۔

دوسری جانب  کراچی کے علاقے تھانہ گلستان جوہر پولیس نے بھاری مقدار منشیات کی سپلائی ناکام بنا دی ۔  پولیس نے  2 ملزمان گرفتار کرلیے  ۔

ترجمان ضلع ایسٹ پولیس  کے مطابق ملزمان دلنواز خان اور حبیب اللہ سے بھاری مقدار میں 25 کلو گرام چرس برآمد  کر لی گئی ۔  ملزمان رکشے کے دو مختلف حصوں میں منشیات رکھ کر سپلائی  کیلئے لے کر جارہے تھے ، ملزمان  شہر کے مختلف علاقوں میں منشیات  فروخت کرتے ہیں ۔ پولیس نے  ملزمان کے زیر استعمال رکشہ ضبط کرتے ہوئے  مقدمہ درج کرلیا ۔