ن لیگ اور پیپلز پارٹی نے ایک دوسرے کی پیٹھ میں چھرا گھونپا، فردوس عاشق اعوان

وزیراعلیٰ پنجاب کی معاون خصوصی  اطلاعات ڈاکٹر فردوس عاشق اعوان کا بیان میں کہنا ہے  کہ  چیئرمین و ڈپٹی چیئرمین سینیٹ کے الیکشن میں پی ڈی ایم کی منفی سیاست کا جنازہ دھوم سے نکلا،  فردوس عاشق اعوان

پی ڈی ایم کا بدبودار بدن مردہ ہوچکا ہے، اس میں زندگی کی کوئی رمق باقی نہیں ہے،پی ڈی ایم کی میت کی جلد پورے”اعزاز“ کے ساتھ تدفین ہو گی۔

 فردوس عاشق اعوان نے کہا کہ  غیر فطری اتحاد اپنے منطقی انجام کی جانب بڑھ رہاہے،جعلی راجکماری، سندھ کے شہزادے او رمولانا کی راہیں جدا ہونے کا وقت آگیاہے، مسلم  لیگ ن  اور پیپلز پارٹی نے ایک دوسرے کی پیٹھ میں چھرا گھونپا ہے،عبرتناک شکست کے بعد یہ کرپٹ ٹولہ گھر کا رہا نہ گھاٹ کا،کل تک شادیانے بجانے والے اب اپنا سر پیٹ رہے ہیں، پاکستان کے بدنام زمانہ یہ ٹھگ ہر جگہ رسوا ہوئے ہیں او رہوتے رہیں گے۔

معاون خصوصی نے کہا کہ مرکز کے بعد پنجاب سے بھی یہ لوگ دم دبا کر بھاگ چکے ہیں، وزیراعلیٰ پنجاب سردار عثمان بزدار وزیراعظم عمران خان کے سپاہی ہیں،وزیراعظم عمران خان کو وزیراعلیٰ عثمان بزدار پر مکمل اعتماد ہے، وزیراعلیٰ عثمان بزدار نے کورونا کی حالیہ لہر پر قابو پانے کے لئے سنجیدہ اور بروقت فیصلے کئے ہیں۔

معاون خصوصی  اطلاعات پنجاب فردوس عاشق اعوان کا کہنا تھا کہ   پنجاب میں گزشتہ 24 گھنٹے میں کورونا کے1239 نئے مریض سامنے آئے ہیں ،کورونا کے ایکٹو کیسوں کی تعداد 9106تک پہنچ چکی ہے، پنجاب میں اب تک5731 کورونا کے مریض جاں بحق ہو چکے ہیں، گزشتہ 24 گھنٹے کے دوران پنجاب میں کورونا کے34 مریضوں کا انتقال ہوا، پنجاب میں گزشتہ 24گھنٹے کے دوران کورونا کے 16377ٹیسٹ کئے گئے جبکہ   پنجاب میں اب تک 3497102کورونا ٹیسٹ کئے جا چکے ہیں۔