دُنیائے کرکٹ میں شین وارن کی کمی محسوس کی جائے گی: وزیراعظم 

تفصیلات کے مطابق سماجی رابطے کی ویب سائٹ ٹوئٹر پر جاری  ایک  بیان میں وزیراعظم عمران خان میں آسٹریلوی لیجنڈ  کرکٹر شین وارن  کی موت پر دُکھ کا اظہار کیا ۔

وزیراعظم عمران خان نے اپنے بیان میں کہا کہ لیگ اسپن کے فن کو نئی بلندیوں پر لے جانے والے باؤلنگ کے ماہر کرکٹر شین وارن کے اچانک انتقال کے بارے میں جان کر بے حد دکھ  ہوا، ان کی کمی دنیائے کرکٹ میں محسوس کی جائے گی ۔ 

Saddened to learn of the sudden passing of cricketer Shane Warne, a bowling genius who took the art of leg spin to new heights. He will be missed across the cricketing world.

— Imran Khan (@ImranKhanPTI) March 5, 2022

واضح رہے کہ آسٹریلیا کے لیجنڈری اسپنر شین وارن 4 مارچ کو دل کا دورہ پڑنے سے 52 برس  کی عمر میں انتقال کرگئے تھے ۔  لیگ اسپنر شین وارن نے آسٹریلیا کی جانب سے 2 جنوری 1992 کو سڈنی میں بھارت کے خلاف بین الاقوامی کرکٹ کا سفر شروع کیا تھا۔

شین وارن نے آسٹریلیا کی جانب سے 145 ٹیسٹ میچز میں 708 وکٹیں لیں، شین وارن نے 194 ون ڈے انٹرنیشنل  میچز میں 293 کھلاڑیوں کو آؤٹ کیا۔ شین وارن نے 1992 سے 2007 تک آسٹریلیا کی نمائندگی کی۔ 

انہوں نے اپنا آخری ایک روزہ میچ ورلڈ الیون کی جانب سے ایشیا الیون کے خلاف 10 جنوری 2005 کو کھیلا، جس میں ان کی ٹیم فاتح رہی اور وہ 2 وکٹیں حاصل کر پائے ۔ شین وارن نے 2013 میں تمام طرز کی کرکٹ سے کنارہ کشی سے قبل انڈین پریمیئر لیگ (آئی پی ایل) میں ٹی ٹوئنٹی کرکٹ کھیلی تاہم وہ کرکٹ سے مسلسل  وابستہ  رہے۔