پیپلز پارٹی اب زرداری کی پارٹی بن چکی ہے: وزیر خارجہ

تفصیلات کے مطابق  وزیر خارجہ شاہ محمود قریشی نے جلسے سے خطاب کرتے ہوئے کہا کہ پیپلز پارٹی اب زرداری کی پارٹی بن چکی ہے جبکہ ملتان اور بدین جلسے میں زمین آسمان کا فرق تھا ، ملتان کا شہری سمجھتا ہے پیپلز پارٹی اب بھٹو کی پارٹی نہیں، ملتان کے لوگوں نے پیپلزپارٹی کو مسترد کر دیا، پنجاب تو 2018 میں مسترد کر چکا، ملتان نے 2013 میں بھی پیپلز پارٹی کو مسترد کیا تھا۔ 

ان کا کہنا تھا کہ  یہ وہی ملتان ہے جہاں سے ذوالفقار علی بھٹو ایم این اے بنے تھے ، ملتان نے پیپلز پارٹی سے منہ موڑ لیا ہے ، زرداری سوچ کےساتھ پیپلز پارٹی کے کارکن متفق نہیں۔

وزیرخارجہ  نے کہا کہ بلاول بھٹو نے جنوبی پنجاب کو صوبہ بنانے کی بات کی اس کی تائید کرتا ہوں ، جنوبی پنجاب صوبہ ہمارے منشور کا حصہ ہے ۔  پیپلز پارٹی نے جنوبی پنجاب صوبے کے دعوے بہت کیے لیکن عملی طور پر کچھ نہیں کیا ۔  جنوبی پنجاب صوبہ کے لیے عملی اقدام صرف عمران خان نے اٹھائے ۔

شاہ محمود قریشی نے کہا ہے کہ  کراچی کا باشعور شہری پوری نظر رکھتا ہے  ، کراچی عمران خان کی توقعات پر پورا اترے گا، سندھ حکومت کی سیکیورٹی اور پروٹوکول نہیں لوں گا۔ ملتان میں کیا ہوا وہ بلاول بھٹو کو دیکھنا چاہیے۔