گھانا میں فوجی ہیلی کاپٹر حادثہ، وزیر دفاع سمیت 9 افراد ہلاک

افریقی ملک گھانا میں ایک فوجی ہیلی کاپٹر گر کر تباہ ہوگیا، جس کے نتیجے میں دو وزرا سمیت 9 افراد جاں بحق ہو گئے۔

برطانوی خبر رساں ایجنسی کے مطابق حادثہ گھانا کے جنوبی حصے میں پیش آیا، جب ایک فوجی ہیلی کاپٹر پرواز کے دوران حادثے کا شکار ہو گیا۔

حکومتی ترجمان نے تصدیق کی ہے کہ جاں بحق افراد میں گھانا کے وزیر دفاع اور وزیر ماحولیات بھی شامل ہیں۔

ہیلی کاپٹر میں سوار دیگر افراد میں ایئرفورس کے تین اہلکار اور بعض دیگر حکومتی افسران شامل تھے۔

گھانا کے صدر نے اس سانحے کو قومی المیہ قرار دیتے ہوئے لواحقین سے گہرے دکھ اور ہمدردی کا اظہار کیا ہے۔

دوسری جانب، گھانا کی فوج کی جانب سے جاری بیان میں بتایا گیا ہے کہ حادثے سے قبل ہیلی کاپٹر سے رابطہ منقطع ہو گیا تھا۔ واقعے کی مکمل تحقیقات کا آغاز کر دیا گیا ہے۔