پی آئی اے کا خصوصی طیارہ یوکرین میں پھنسے 230پاکستانیوں کو لے کر وطن واپس پہنچ گیا

پی آئی اے کے ترجمان عبداللہ خان کی طرف سے جاری اعلامیہ کے مطابق طیارہ منگل کی صبح پاکستان سے پولینڈ کے دارالحکومت وارسا روانہ کیا گیا تھا ۔

 وزارت خارجہ اور حکومت پاکستان کی ہدایات پر یہ طیارہ روانہ کیا گیا ۔ پی کے 7788 بدھ کو رات 12 بجے اسلام آباد کے ہوائی اڈے پر واپس لینڈ کر گیا۔

پی آئی اے اور وزارت خارجہ کی حکام نے ائیرپورٹ پر پاکستانی طلبا اور مسافروں کا خیر مقدم کیا۔اس موقع پر ہوائی اڈے پر رقت آمیز مناظر دیکھنے میں آئے اور وطن واپس پہنچنے پر بہت سے مسافر وطن کی سرزمین پر آبدیدہ ہو گئے۔ 

گزشتہ روز پی آئی اے کا طیارہ یوکرین میں پھنسے پاکستانیوں کو لینے کیلئے پولینڈ روانہ ہوا تھا ، اس حوالے سے ترجمان پی آئی اے  کاکہنا تھا کہ حکومت پاکستان کی ہدایات پر مزید پروازیں بھی چلائی جائیں گی۔ 

 گزشتہ دنوں ایک پریس کانفرنس کے دوان وفاقی وزیر ہوا بازی غلام سرور خان نے کہا تھا کہ پاکستان انٹرنیشنل ایئر لائنز (پی آئی اے) پولینڈ سے پاکستانی طلبہ کو فضائی راستےسے نکالنے کے لیے انخلا کا عمل شروع کرنے کے لیے تیار ہے۔

دوسری جانب روس نے آج پھر یوکرین میں پھنسے شہریوں کو محفوظ راہداری دینے کا اعلان کیا ہے، جس کے بعد پا کستانی وقت کے مطابق دوپہر 12 بجے سے یوکرین میں پھنسے شہریوں کو انخلاء کی اجازت ہوگی۔ اقوام متحدہ کے مطابق روس کے حملوں سے اب تک 20 لاکھ سے زائد افراد یوکرین چھوڑ کر جاچکے ہیں۔