پارلیمنٹ سے استعفے نہیں دیتے تولانگ مارچ کی زیادہ افادیت نہیں ہوگی: مولانا فضل الرحمٰن

تفصیلات کے مطابق پاکستان ڈیموکریٹک موومنٹ (پی ڈی ایم ) کے سربراہ مولانا فضل الرحمان نے میڈیا سے گفتگو کرتے ہوئے  کہا کہ کل پی ڈی ایم  کا اجلاس ہوگا جس میں لانگ مارچ اور استعفوں پر بات کی جائے گی۔ پارلیمنٹ سے استعفے نہیں دیتے تولانگ مارچ کی زیادہ افادیت نہیں ہوگی،کل پی ڈی ایم کا سربراہی اجلاس ہوگا، پارلیمنٹ سے استعفوں کو بھی ایجنڈے پر رکھاگیا ہے کیونکہ  استعفوں کےبغیرلانگ مارچ بے سودہوگا۔   کل پی ڈی ایم اجلاس میں لانگ مارچ سے متعلق حتمی حکمت عملی طے ہوگی۔ان کاکہنا تھا کہ   پوری قوم نے دیکھاسینیٹ کے ایوان میں کیمرے کس نے لگائے، جائز ووٹ کوکیوں مستردکیاگیا؟ووٹ مستردہونے کاملبہ بھی عدالتوں پرڈال دیاگیا۔2 ارب روپے کے ڈیفالٹرکوالیکشن میں حصہ لینے کی اجازت کیوں دی گئی؟

سربراہ پی ڈی ایم نے کہاکہ عدالتیں آخری امید بن چکی ہیں ،  مریم نواز کودھمکیاں دی جارہی ہیں،  مریم نوازکی ضمانت منسوخ کرانے کے لیے نیب نے ہائیکورٹ سے رجوع کرلیا ہے، نیب دیگراداروں کا ترجمان بن کرہمارے موقف کی تصدیق کررہا ہے، کیا نیب اداروں کا ترجمان ہے؟   ان کاکہنا تھا کہ  2018سےملکی سیاست میں مداخلت ساری قوم دیکھ رہی ہے، حال ہی میں سینیٹ انتخابات میں اسٹیبلشمنٹ کاکردارنمایاں نظرآیا۔ ملکی سیاست پاکستان کے آئین کے مطابق نہیں چل رہی،موجودہ حکومت نے معیشت کوتباہ کردیا،سالانہ معیشت کا تخمینہ صفر سے نیچے چلا گیا ہے۔

مولانا فضل الرحمان نے کہاکہ ہمارے ووٹ کیوں کم ہوئے،وفاداریاں کیوں تبدیل ہورہی ہیں،اس کے پیچھے دباؤ ہوگا،لالچ یا دھمکیاں ہوں گی،ان کاکہناتھا کہ ماضی میں مختلف جماعتوں کے اراکین نے اپنے ووٹ کوغلط استعمال کیا۔ سربراہ پی ڈی ایم نے کہاکہ اپوزیشن جماعتیں متحد ہیں،26 مارچ کولانگ مارچ کیلئے پورے ملک سے قافلے روانہ ہوجائیں گے۔ تمام جماعتیں لانگ مارچ میں حصہ لینے کیلئے تیارہیں اور کورونا ہمارا راستہ نہیں روک پائے گا۔

واضح رہے کہ اپوزیشن اتحاد پاکستان ڈیموکریٹک موومنٹ (پی ڈی ایم) نے حکومت کے خلاف 26 مارچ کو لانگ مارچ کا اعلان کر رکھا ہے۔