عمران خان وزیراعظم کے منصب کا قانونی اور آئینی جواز کھو چکے ہیں:مریم نواز

مسلم لیگ ن کی نائب صدر مریم نواز نے سماجی رابطے کی ویب سائٹ ٹوئٹر پر  ایک پیغام میں کہا ہے کہ بقول عمران خان کے چودہ اراکان ان کا ساتھ چھوڑ گئے ہیں اور انہوں نے ان کو شوکاز نوٹس جاری کردیے ہیں تو اسکا مطلب یہ ہے کہ 342 کے ایوان میں 165 ارکان ان کے ساتھ رہ گئے ہیں۔

 انہوں نے کہا کہ گویا عمران خان اکثریت کھو چکے ہیں، آپ وزیراعظم کے منصب کا اخلاقی، قانونی اور آئینی جواز کھو چکے ہیں، اب اقتدار سے چپکتے رہنے کا فائدہ؟

اگر بقول آپکے چودہ اراکان آپکا ساتھ چھوڑ گئے ہیں اور آپ نے انہیں شوکاز نوٹس جاری کردیےہیں تو اسکامطلب یہ ہےکہ 342 کے ایوان میں165ارکان آکے ساتھ رہ گئےہیں۔گویا آپ اکثریت کھو چکے ہو۔آپ وزیراعظم کے منصب کا اخلاقی، قانونی اور آئینی جواز کھو چکے ہو۔اب اقتدار سےچپکتے رہنے کا فائدہ؟

— Maryam Nawaz Sharif (@MaryamNSharif) March 19, 2022

 
مریم نواز نے کہا کہ عوامی نمائندوں کے سامنے دو راستے ہیں، پہلا یہ کہ عوام کے ساتھ کھڑے ہوجائیں، دوسرا یہ کہ آپ کی ڈوبتی کشتی میں غرق ہو کر رسوائی اور بدنامی کی تاریخ کا حصہ بن جائیں۔

مسلم لیگ ن کی نائب صدر نے کہا کہ دوسروں کو شوکاز نوٹس جاری کرنے سے پہلے اس شوکاز نوٹس کا جواب دو جو پوری قوم نے آپ کو دے رکھا ہے۔

انہوں نے کہا کہ آپ نے پورے پاکستان کو غربت،مہنگائی، بے روزگاری اور بدامنی میں دھکیل کر اپنی جماعت کے کس رکن کو اس قابل چھوڑا ہے کہ وہ عوام کا سامنا کرے؟ آپ ایک بوجھ ہیں جو اب کوئی نہیں اٹھا سکتا۔