وزیراعظم عمران خان سے مصر کے وزیر خارجہ کی ملاقات

وزیراعظم نے اقتصادی اور تجارتی شعبوں میں دوطرفہ سیاسی تعلقات کو مزید وسعت دینے کے لیے ٹھوس بنیادوں پر استوار کرنے کی اہمیت پر زور دیا جبکہ وزیراعظم نے وسیع تر علاقائی اور بین الاقوامی مسائل پر پاکستان اور مصر کے درمیان ہم آہنگی پر بھی زور دیا۔

ملاقات میں وزیراعظم نے وزیر خارجہ شوکری سے باہمی دلچسپی کے مختلف امور پر تبادلہ خیال کیا جبکہ وزیراعظم نے پاکستان اور مصر کے درمیان تاریخی اور گہرے برادرانہ تعلقات کو نوٹ کیا۔ 
وزیر اعظم عمران خان نے وزیر خارجہ شوکری سے مختلف علاقائی اور عالمی امور کے ساتھ ساتھ امت اسلامیہ کے معاملات پر بھی تبادلہ خیال کیا جبکہ وزیراعظم نے بھارت کے غیر قانونی طور پر مقبوضہ جموں و کشمیر میں انسانی حقوق کی سنگین خلاف ورزیوں اور خطے کو لاحق خطرات پر بھی روشنی ڈالی۔

ملاقات میں وزیراعظم نے اقوام متحدہ کی جنرل اسمبلی کی جانب سے 15 مارچ کو ‘اسلامو فوبیا سے نمٹنے کے لیے عالمی دن’ کے طور پر قرار دینے پر متفقہ طور پر تاریخی قرارداد کی منظوری کو سراہا۔

وزیر اعظم نے او آئی سی کے پلیٹ فارم سمیت دنیا بھر میں مسلمانوں کے لیے انصاف کے مقصد کو آگے بڑھانے کی ضرورت پر زور دیا جبکہ وزیراعظم نے بڑھتے ہوئے تعاون کے ذریعے خوشحالی اور پائیدار ترقی کے حصول پر توجہ مرکوز کرتے ہوئے اسلامی ممالک کے درمیان اتحاد اور یکجہتی کو فروغ دینے کی اہمیت پر بھی زور دیا۔

اس موقع پر وزیراعظم عمران خان نے صدر عبدالفتاح السیسی کے ساتھ اپنی ملاقاتوں اور بات چیت کو یاد کیا اور کہا کہ دونوں ممالک کے درمیان باہمی طور پر فائدہ مند روابط بڑھانے کی بڑی گنجائش اور امکانات موجود ہیں۔