وزیر خارجہ شاہ محمود قریشی کی فلسطین کے وزیرخارجہ سے ملاقات

او آئی سی وزرائے خارجہ کونسل کے اڑتالیسویں اجلاس کے موقع پر وزیر خارجہ شاہ محمود قریشی کی فلسطین کے وزیرخارجہ ریاض المالکی کے ساتھ ملاقات ہوئی جس میں دو طرفہ تعلقات ، فلسطین کی صورتحال اور باہمی دلچسپی کے علاقائی و عالمی امور پر تبادلہ خیال کیا گیا۔

دوران ملاقات وزیر خارجہ نے فلسطین کے وزیر خارجہ ریاض المالکی کو او آئی سی وزرائے خارجہ کونسل کے اڑتالیسویں اجلاس میں شرکت کیلئے پاکستان تشریف آوری پر خوش آمدید کہا۔

ملاقات میں دونوں وزرائے خارجہ نے پاکستان اور فلسطین کے درمیان سیاسی، اقتصادی و پارلیمانی روابط کے فروغ کیلئے مشترکہ کاوشیں بروئے کار لانے پر اتفاق کیا۔

 اس موقع پر فلسطینی وزیر خارجہ نے فلسطین کی موجودہ صورتحال سے وزیر خارجہ کو آگاہ کیا جس پر وزیر خارجہ نے پاکستان کی قیادت اور عوام کی جانب سے فلسطین کی قیادت اور عوام کیلئے یکجہتی کا اظہار کیا۔

وزیر خارجہ شاہ محمود قریشی نے کہا کہ پاکستان فلسطین کے ساتھ اپنے تعلقات کو خصوصی اہمیت دیتا ہے، پاکستان او آئی سی سمیت تمام عالمی فورمز پر مسئلہ فلسطین کیلئے آواز بلند کرتا آ رہا ہے۔

 شاہ محمود قریشی کا کہنا تھا کہ وزیر اعظم عمران خان نے او آئی سی وزرائے خارجہ کونسل کے اڑتالیسویں اجلاس سے خطاب کرتے ہوئے مسئلہ فلسطین کی جانب عالمی برادری کی توجہ مبذول کروائی اور اس دیرینہ مسئلے کے جلد منصفانہ حل کے مطالبے پر زور دیا۔