اوآئی سی کا رکن ممالک کے مشترکہ مفادات کاتحفظ، فلسطین، کشمیرکی حمایت کاعزم

او آئی سی کے وزرائے خارجہ کونسل کے دو روزہ 48ویں اجلاس کے اختتام پر اسلام آباد میں جاری کئے گئے اعلامیے میں رکن ممالک نے او آئی سی سے باہر کے ممالک میں مسلمان اقلیتوں کے حقوق اور مفادات کے تحفظ کے علاوہ مشترکہ چیلنجز سے نمٹنے اور مواقع سے استفادہ کرنے کے لئے کوششوں کو تیز کرنے کا عزم کیاہے ۔

اعلامیے میں عالم اسلام اور دیگرملکوں نے سماجی، اقتصادی اور ٹیکنالوجی کے شعبے کی ترقی اور مربوطی کے لئے مشترکہ حکمت عملی تیار کرنے پرزوردیاہے۔

اعلامیے میں تنازعات سے بچنے اورامن کے فروغ کے لئے حل تلاش کرنے اور اس کا طریقہ کار طے کرنے کے لئے رواں برس یاآئندہ سال وزارتی ا جلاس بلانے کے لئے کہاگیاہے۔

اعلامیے میں افغانستان انسانی ٹرسٹ فنڈ کے اجراء کا خیرمقدم کیا گیا۔فورم نے اقوام متحدہ کی جنرل اسمبلی کی طرف سے پندرہ مارچ کو بین الاقوامی طور پر اسلاموفوبیا کے خلاف دن منانے کے متفقہ فیصلے اور اس حوالے سے خصوصی ایلچی کی تعیناتی کے وزرائے خارجہ کونسل کے فیصلے کا خیرمقدم کیا۔