حکومت چھوٹی چیز ہے جان بھی چلی جائے تو چوروں کو نہیں چھوڑوں گا: عمران خان

کمالیہ میں جلسہ عام سے خطاب کرتے ہوئے وزیر اعظم عمران خان کا کہنا تھا کہ سب سے پہلے آصف زرداری، پھر ڈیزل اور سب سے زیادہ شکر گزار ہوں پاکستان کے سب سے زیادہ بوٹ پالش کرنے والے شہباز شریف کا کہ ان کی شکلیں دیکھ کر لوگ خوف زدہ ہوئے کہ یہ لوگ واپس نہ آجائیں اور لوگ میری طرف آگئے۔

ان کا کہنا تھا کہ پاکستان تحریک انصاف (پی ٹی آئی) سے ناراض ہونے والے بھی ان چوہوں کی شکلیں دیکھ کر واپس آ گئے ہیں،میں نے ساری دنیا دیکھی ہوئی ہے اور شاید ہی دنیا کا کوئی ایسا ملک ہو جو میں نے نہ دیکھا ہو،جو قوم اچھے اور برے کی تمیز نہیں کرتی وہ قوم مر جاتی ہے۔

عمران خان کا کہنا تھا کہ میں نے برطانیہ کا نظام بہت اندر سے دیکھا ہے،جب قوم میں اچھے اور برے کی تمیز ختم ہوجائے وہ قوم تباہ ہوجاتی ہے،انسان نیوٹرل نہیں ہو سکتا اور انسان اچھائی اور برائی کو دیکھ سکتا ہے۔

انہوں نے کہا ہے کہ آصف زرداری اس ملک کی بڑی بیماری ہے اور آصف زرداری پر نیب میں اربوں روپے کے کیس ہیں،چیری بلاسم سے جوتا زیادہ چمکتا ہے اور شہباز شریف کے چپڑاسی کے اکاؤنٹ میں 375 کروڑ روپے آگئے جبکہ نوکروں کے اکاؤنٹ میں 16 سو کروڑ روپے آ گئے۔

ان کا کہنا تھا کہ شہباز شریف کا کیس چل رہا ہے لیکن کبھی ان کا وکیل نہیں آتا تو کبھی ان کی قمر میں درد ہو جاتا ہے،ان کو پتہ ہے کہ عمران خان تھوڑی دیر اور چل گیا تو شہباز شریف نے جیل جانا ہے۔

ان کا مزید کہنا تھا کہ چوتھا فنکار لندن میں بیٹھا ہوا ہے جسے عدالت مجرم قرار دے چکی ہے، چوتھے فنکار کی بیٹی کے نام پر اربوں روپے کے لندن میں محل نکل آئے،یہ سارے نیب زدہ میرے خلاف اکٹھے ہوئے ہیں۔