وزیراعظم نے چوہدری پرویز الہی کو وزارت اعلی دینے کا سگنل دے دیا

جی این این کے مطابق  ذرائع کاکہنا ہے کہ وزیراعظم چوہدری پرویز الہی کو وزیراعلی بنانے پر آمادہ ہو گئے، حکومتی وفد کی چوہدری برادران سے ملاقات جاری ہے ۔ 

ملاقات میں شاہ محمود قریشی،اسد عمر اور پرویز خٹک حکومتی وفد میں شامل جبکہ ق لیگ کی جانب سے پرویزالہٰی ،وجاہت حسین،مونس الہٰی،سالک حسین ،طارق چیمہ ملاقات میں موجود ہیں ۔ 

یاد رہے ہفتے کے روز وزیر خارجہ شاہ محمود قریشی اور وزیر دفاع پرویز خٹک کی چوہدری پرویز الہی سے ملاقات ہوئی تھی ، ملاقات میں وفاقی وزرا نے وزیر اعظم عمران خان کا پیغام چوہدری برادران تک پہنچایا تھا۔

وزیراعلیٰ پنجاب کیخلاف تحریک عدم اعتماد

دوسری جانب اپوزیشن نے وزیراعلیٰ پنجاب کیخلاف بھی تحریک عدم اعتماد جمع کرادی ہے ، وزیراعلیٰ پنجاب عثمان بزدار کے خلاف جمع کرائی گئی قرارداد میں  وزیراعلیٰ کی کاردگی کو نشانہ بنایا گیا ہے۔ تحریک عدم  اعتماد  کی قرارداد پر رانا مشہود، رمضان صدیق، ملک احمد اور  میاں نصیر احمد کے دستخط موجود ہیں۔

قرار داد کے متن  میں کہا گیا ہےکہ وزیراعلیٰ عثمان بزدار پر ایوان کی اکثریت کا اعتماد نہیں رہا، پنجاب کے معاملات آئین کے تابع نہیں چلائے جارہے، عثمان بزدار نے پنجاب میں جمہوری روایات کا قلع قمع کیا۔

اپوزیشن کی جانب سے تحریک عدم اعتماد جمع کرائے جانے کے بعد اب اسپیکر 14 دن میں اسمبلی کا اجلاس طلب کرنے کے پابند ہیں۔ تحریک عدم اعتماد جمع ہونے کے بعد وزیر اعلیٰ اسمبلی  تحلیل نہیں کر سکتے۔