ہمارے دل اور دروازے کھلے ہیں ، جیسے چاہیں گے کر لیں گے: حکومت کی ایم کیو ایم کوآفر

تفصیلات کے مطابق رات گئے تحریک عدم اعتماد پراپوزیشن اور ایم کیو ایم کے درمیان معاہدہ طے پانے کےبعد حکومتی وفد بھی پارلیمنٹ لاجز میں ایم کیو ایم سے ملاقات کے لیے جا پہنچا ۔ پرویز خٹک ،عمران اسماعیل پر مشتمل 2رکنی حکومتی وفد نے مذاکرات کیے  ۔ 

حکومتی وفد نے وزیر اعظم عمران خان کا اہم پیغام ایم کیو ایم کو پہنچایا۔ گورنر سندھ عمران اسماعیل کا کہنا تھا کہ حکومتی وفد وزیراعظم عمران خان کا پیغام لے کر پہنچا ہے، ایم کیو ایم کے ساتھ ہر قسم کے معاہدے  کے لیے موجود ہیں ،ایک وزارت آفر کی تھی،اس سے آگے بھی جو چاہیں گے دیں گے۔

 ان کاکہنا تھا کہ  ہمارے دل اور دروازے کھلے ہیں ، امید ہےایم کیو ایم سوچ سمجھ کر فیصلہ کرے گی، انشاء اللہ صبح تک فیصلہ ہو جائے گا۔ 

گورنر سندھ  کا کہنا تھا  کہ وزیر اعظم کا اہم پیغام خالد مقبول صدیقی کو پہنچایا ہے۔ایم کیو ایم کے تحفظات دور کرنے کی کوشش کی ہے۔ ایم کیو ایم پاکستان کے وفد سے کل دوبارہ ملاقات ہو گی۔ 

عمران اسماعیل نے کہا کہ صبح ایم کیو ایم کی کال کا  انتظار کروں گا، ایم کیو ایم اپوزیشن معاہدے کا علم نہیں ، ایم کیو ایم کیلیےبڑا نازک اور حساس فیصلہ ہو گا، پیپلز پارٹی نےہمیشہ ایم کیو ایم سے دھوکا کیا ہے، اپوزیشن جماعتوں کا چوروں کا جھرمٹ تو کچھ بھی آفر کرنے کیلیے تیار ہے۔