امریکہ : کورونا ویکسین کا دوسرا بوسٹر شاٹ منظور

تفصیلات کے مطابق امریکی ادارے فوڈ اینڈ ڈرگ ایڈمنسٹریشن ( ایف ڈی اے)  کی جانب سے جاری ایک بیان میں کہا گیا ہے کہ فائزر اور موڈرنا ویکسین کی چوتھی اور تیسری ڈوز کے 4 ماہ بعد بوسٹر شاٹ لگایا جاسکے گا ، کورونا ویکسین کا دوسرا بوسٹر شاٹ 50 سال سے زائد عمر کے افراد کو لگایا جاسکے گا۔

امریکی ادارے کے مطابق کمزور قوت مدافعت والے 12سال سے زائد عمر کے بچوں کو فائزر کا دوسرا بوسٹر شاٹ دیا جاسکے گا ، جبکہ کمزور قوت مدافعت والے 18سال سے زائد عمر کے افراد کو موڈرنا کا دوسرا بوسٹر ڈوز لگایا جائے گا۔

وائٹ ہاؤس کی کمیونیکیشن ڈائریکٹر کیٹ بیڈنگ فیلڈ نے پریس بریفنگ میں کہا ہے کہ کورونا بوسٹر ڈوز کی دوسری خوراک کی منظوری  فیصلہ اچھا  ہے، دوسرے بوسٹر شاٹ کا مقصد شدید بیماری اور اسپتال میں داخل ہونے کے خلاف مزید تحفظ دینا ہے۔

کیٹ بیڈنگ فیلڈ کا کہنا ہے کہ امریکی صدر جو بائیڈن معالج کے مشورے کے بعد دوسرا بوسٹر شاٹ لگوانے کا فیصلہ کریں گے۔