علیم خان کے الزامات پر تحریک انصاف کا رد عمل

سماجی رابطے کی ویب سائیٹ ٹوئیٹر پر علیم خان کے الزامات پر رد عمل کا اظہار کرتے ہوئے رہنما تھڑیک انصاف فواد چودھری نے کہا کہ علیم خان صاحب کی پریس کانفرنس پر سخت افسوس ہوا۔ انہوں نے کہا کہ علیم خان کے تمام گلے حکومت کے دوسرے سال کے ہیں، جب حکومت تھی اس وقت بات ہوتی تو کوئی وزن بھی تھا۔ اس وقت یہ الزامات نامناسب ہیں۔ فواد چودھری نے کہا جب آپ کسی کے قریب رہے ہوں اور بعد میں اس سے اختلافات ہو جائیں تو گفتگو میں تہمتیں لگانے سے اپنی ہی عزت کم ہوتی ہے۔

علیم خان صاحب کی پریس کانفرنس پر سخت افسوس ہوا، جب آپ کسے کے قریب رہے ہوں اور اختلافات ہو جائیں تو گفتگو میں تہمتیں آپ کی اپنی عزت کم کرتی ہیں،آپ کے تمام گلے دوسرے سال کے ہیں جب حکومت تھی اس وقت بات ہوتی تو کوئ وزن بھی تھا اس وقت الزامات اور رکیک حملے نامناسب ہیں

— Ch Fawad Hussain (@fawadchaudhry) April 4, 2022

یاد رہے کہ اس سے قبل پی ٹی آئی کے ناراض رہنما علیم خان نے لاہور میں میڈیا سے گفتگو کرتے ہوئے کہا کہ بہت ساری ایسی باتیں تھی جو میں چاہتا تھا کہ قوم کے سامنے رکھوں اور لوگوں تک کچھ حقائق پہنچیں۔ ان کا کہنا تھا کہ 30 اکتوبر 2011 کا جلسہ آیا تو عمران خان اور میاں محمودالرشید میرے پاس تشریف لائے اور کہا کہ یہ جلسہ آپ نے آرگنائز کرنا ہے اور اس کے بعد 2018 تک شاید ہی کوئی ایسا ایونٹ، جلوس، ریلی اور احتجاج نہیں جس کی انتظامی ذمہ داری میری یا میری ٹیم کی نہ رہی ہو۔

علیم خان کا کہنا تھا کہ اگر خان صاحب سچے ہیں تو میرے ساتھ بیٹھ کر مقابلہ کریں، اگر میں جھوٹا ہوا تو سب کے سامنے اپنے آپ کو گولی ماروں گا۔انہوں نے کہا ہے کہ 183ممبران میں سے پی ٹی آئی میں کوئی قابل بندہ نظرنہیں آیا، پرویزالہیٰ سے صرف پانچ ووٹ لینے کے لیے فیصلہ کیا گیا، سب سے بڑا ڈاکو پرویزالہی کو کس نے کہا تھا؟ اور ہمیں غدار کہا جا رہا ہے، پرویزالہیٰ کو اگر وزیراعلیٰ بنانا تھا تو 26 سال جدوجہد کرنے کی کیا ضرورت تھی؟

علیم خان کا کہنا تھا کہ شجاعت حسین کے بیٹے کو اپوزیشن کے ساتھ کھڑا ہونے پر سلام پیش کرتا ہوں، ہم تو غدار بن گئے ہمت کریں کہیں (ق) لیگ والوں کے نام لیں، مونس الہیٰ نے بولیاں لگا کر بازار لگایا ہوا ہے، نیا پاکستان اب پرویزالہی بنائیں گے افسوس ہوتا ہے، عثمان بزدار کے بارے میں عمران خان کو بتایا لیکن کچھ نہیں ہوا، عمران خان کے ترجمان ایسے ہیں جن کی ہم نے شکلیں بھی نہیں دیکھی تھیں۔ ان کا مزید کہنا تھا کہ عثمان بزدار کے بارے میں صرف میں نے نہیں پارٹی کے اور لوگوں نے بھی شکایات کی تھیں۔