ڈپٹی سپیکر پنجاب اسمبلی کے خلاف تحریک عدم اعتماد  جمع  

جی این این کے مطابق پی ٹی آئی کی طرف سے اپنی ہی جماعت کے  ڈپٹی سپیکر پنجاب اسمبلی سردار دوست محمد مزاری کے خلاف عدم اعتماد کی تحریک آج صبح سیکرٹری اسمبلی کے آفس میں جمع کرادی گئی ۔ ڈپٹی اسپیکر کو ایوان کی کارروائی سے الگ کرنے کے لئے تحریک عدم اعتماد جمع کروائی گئی ہے۔   تحریک عدم اعتماد میاں محمود الرشید اور دیگر ارکان اسمبلی کے دستخطوں سے جمع کروائی گئی ہے۔

ذرائع  کے مطابق عدم اعتماد کی تحریک پنجاب اسمبلی میں جمع ہونے کے بعد سردار دوست محمد مزاری اسمبلی اجلاس طلب کرنے کے مجاز نہیں رہے ۔

دوسری جانب  ڈپٹی اسپیکر نے قانونی ماہرین سے مشاورت شروع کردی۔ ڈپٹی اسپیکر دوست محمد مزاری کاکہنا ہے کہ  قواعد کے مطابق میں اب بھی اجلاس کی صدارت کرسکتا ہوں ، پنجاب اسمبلی کا اجلاس آج ہرصورت ہوگا اور میں کی صدارت کروں گا۔

خیال رہے کہ ڈپٹی اسپیکر دوست محمد مزاری نے آج شام ساڑھے سات بجے اجلاس طلب کر رکھا تھا،  لیکن ترجمان پنجاب اسمبلی نے آج ہونے والا اجلاس کی تردید کر دی ہے۔

ترجمان نے کہا کہ آج طلب کئے جانے والے اجلاس کو کوئی نوٹیفکیشن نہیں ہوا، اجلاس 16 اپریل کو ہی ہو گا۔

یاد رہے کہ گزشتہ روز ڈپٹی اسپیکر نے پنجاب اسمبلی کا اجلاس 16 اپریل تک ملتوی کرنے کی منظوری دی تھی، ذرائع کے مطابق پنجاب اسمبلی کا اجلاس ایوان میں توڑ پھوڑ کے بعد مرمت کیلئے موخر کیا گیا۔

واضح رہے کہ پنجاب اسمبلی کے 6 اپریل کو ہونے والے اجلاس میں وزیراعلیٰ پنجاب کا انتخاب ہونا تھا۔