اسپیکر پنجاب اسمبلی نے ڈپٹی اسپیکر کے اختیارات ختم کردیے

تفصیلات کے مطابق اسپیکر پنجاب اسمبلی چودھری پرویز الہیٰ نے ڈپٹی اسپیکر دوست محمد مزاری  کے اختیارات ختم کر دیے ہیں۔ جی این این کے مطابق اسپیکر کی جانب سے ڈپٹی اسپیکر کے اختیارات رول 25 کے تحت ختم کیے گئے ہیں۔

اس سے قبل پاکستان تحریک انصاف کی جانب سے ڈپٹی اسپیکر پنجاب اسمبلی سردار دوست محمد مزاری کو ایوان کی کارروائی سے الگ کرنے کے لیے تحریک عدم اعتماد آج صبح سیکرٹری اسمبلی کے آفس میں جمع کروائی گئی۔ تحریک عدم اعتماد میاں محمود الرشید اور دیگر ارکان اسمبلی کے دستخطوں سے جمع کروائی گئی۔ ذرائع  کے مطابق عدم اعتماد کی تحریک پنجاب اسمبلی میں جمع ہونے کے بعد سردار دوست محمد مزاری اسمبلی اجلاس طلب کرنے کے مجاز نہیں رہے۔

دوسری جانب  ڈپٹی اسپیکر نے قانونی ماہرین سے مشاورت شروع کردی۔ ڈپٹی اسپیکر دوست محمد مزاری کا کہنا ہے کہ  قواعد کے مطابق میں اب بھی اجلاس کی صدارت کرسکتا ہوں، پنجاب اسمبلی کا اجلاس آج ہرصورت ہوگا اور میں کی صدارت کروں گا۔

خیال رہے کہ ڈپٹی اسپیکر دوست محمد مزاری نے آج شام ساڑھے 7 بجے اجلاس طلب کر رکھا تھا، لیکن ترجمان پنجاب اسمبلی نے آج ہونے والا اجلاس کی تردید کر دی ہے۔ ترجمان نے کہا کہ آج طلب کیے جانے والے اجلاس کا کوئی نوٹیفکیشن جاری نہیں ہوا، اجلاس 16 اپریل کو ہی ہو گا۔

یہ بھی واضح رہے کہ گزشتہ روز ڈپٹی اسپیکر نے پنجاب اسمبلی کا اجلاس 16 اپریل تک ملتوی کرنے کی منظوری دی تھی۔ بتایا گیا کہ پنجاب اسمبلی کا اجلاس ایوان میں توڑ پھوڑ کے بعد مرمت کے لیے مؤخر کیا گیا۔ پنجاب اسمبلی کے 6 اپریل کو ہونے والے اجلاس میں وزیراعلیٰ پنجاب کا انتخاب ہونا تھا۔