2200 سکھ یاتری واہگہ بارڈر کے ذریعے پاکستان پہنچ گئے

تفصیلات کے مطابق بھارت سے تقریبا دوہزار دو سو سکھ یاتری اپنے مذہبی اور ثقافتی میلے بیساکھی میں شرکت کیلئے آج واہگہ بارڈر لاہور کے ذریعے پاکستان میں داخل ہوئے ۔ 

وقف املاک بورڈ اور پاکستان سکھ گورد وارہ پر بندھک کمیٹی کے عہدید ار یاتریوں کا استقبال کیا ۔ وقف املاک بورڈ کے ترجمان عامر ہاشمی کے مطابق سکھ یاتریوں کیلئے تمام انتظامات مکمل کرلئے گئے ہیں۔

اس حوالے سے انہوں نے کہا کہ لاہور پہنچنے کے بعد یاتری ریل اور کوچز کے ذریعے حسن ابدال پہنچیں گے جہاں جمعرات کو ویسا کھی کی بڑی تقریب ہوگی۔

یاتری اس ما ہ کی 21تاریخ کو پاکستان سے بھارت روانہ ہونگے۔

بیساکھی میلہ :

بیساکھی کا تہوار سکھوں کے لیے مذہبی اعتبار سے انتہائی اہمیت کا حامل ہے ، اس دن ان کے دسویں گرو (گروگوبند سنگھ) نے پانچ پیاروں کا امتحان لے کر سکھ مذہب میں ذات پات کے تصّور کو ختم کیا تھا ۔  

اس میلے کو بیساکھی کے علاوہ وساکھی بھی کہا جاتا ہے اور سکھ برادری کو خالصہ بھی کہتے ہیں اور ان کا یہ تہوار ان کے شمسی سال کی شروعات میں منایا جاتا ہے۔