وزیراعظم کا قطر کے ہم منصب سے نیک تمناؤں پر اظہار تشکر

تفصیلات کے مطابق قطر کے امیر شیخ تمیم بن حمد بن خلفیہ آل ثانی اور نائب امیر شیخ عبداللہ بن حمد نے وزیراعظم شہبازشریف کو مبارک دیتے ہوئے ان کے لئے نیک تمنائوں کا اظہار کیا ہے۔ 

قطر کے امیر اور نائب امیر کے تہنیتی پیغام کے جواب میں وزیر اعظم شہباز شریف نے کہا ہے کہ قطر اور پاکستان برادر ممالک ہیں اور اخوت اور اسلامی بھائی چارے کے عظیم رشتوں میں بندھے ہیں۔

وزیراعظم نے کہا کہ قطر میں بڑی تعداد میں پاکستا نی مقیم ہیں اور وہ قطر کو اپنا دوسرا گھر سمجھتے ہیں۔  وزیراعظم شہباز شریف نے مزید کہا کہ امیر قطر شیخ تمیم بن حمد نے پاکستان کی ہر مشکل اور آڑے وقت میں ذاتی دلچسپی لیتے ہوئے مدد کی ہے جس کی ہم بے حد قدر کرتے ہیں۔

انہوں نے اس توقع کا اظہار کیا کہ مستقبل میں پاکستان اور قطر کے تعلقات کو نئی بلندیوں اور قربتوں سے ہمکنار کریں گے۔

وزیراعظم شہبازشریف نے کہا کہ قطر نے سستی ترین ایل این جی فراہم کر کے پاکستان کو روشن بنانے میں ناقابل فراموش مدد کی ہے۔