شہباز شریف ایک بھی لوٹےکا ووٹ لے کر وزیراعظم نہیں بنے:مریم اورنگزیب

لاہور پریس کلب میں میڈیا سےگفتگو کرتے ہوئے مسلم لیگ ن کی ترجمان مریم اورنگزیب نے کہا کہ کوئی سازشی جھوٹا بھکاری ہے تو وہ عمران خان ہے، دوسروں پر الزام لگانے والا عمران نیازی خود جھوٹا، چور اور سازشی ہے۔

انہوں نے سابق وزیر اعظم عمران خان کو مخاطب کرتے ہوئے کہا کہ شہباز شریف کشکول توڑ کر دوست ممالک کے پاس ترقی کے لیے گئے، وہ تمہاری طرح ملک کی عزت کو روندتے ہوئے بھکاری نہیں بنے۔

اپنی گفتگو میں مریم اورنگزیب کا کہنا تھا کہ عمران نیازی کی کرپشن کے ریکارڈ عوام کے سامنے آ رہے ہیں، دوسروں پر الزام لگانے والا خود جھوٹا، چور اور سازشی ہے۔

انہوں نے کہا کہ جمہوریت کے لیے کردار ادا کرنے والے صحافیوں کے جذبہ کو خراج تحسین پیش کرتی ہوں، پریس کلب کا جمہوری عمل میں کلیدی کردار ہے، گزشتہ دور میں صحافیوں پر بدترین تشدد کیا گیا، صحافیوں کے گھروں کا محاصرہ کیا گیا اور پروگرامز بند کرائے گئے۔

مریم اورنگزیب نے سابق وزیر اعظم کو مخاطب کرتے ہوئے کہا کہ تم نےکون سا ایٹم بم بنایا تھا جو امریکہ نے تمہیں ہٹانےکی سازش کی؟ کوئی سازش نہیں ہوئی، عمران خان کو اپنے جانےکا نہیں، شہباز شریف کے آنےکا غم ہے۔