سری لنکا میں پرتشددمظاہرے،7افراد ہلاک،217 زخمی

غیر ملکی میڈیا کے مطابق حملہ آور وزیر اعظم کی رہائش گاہ کے بیرونی حصے میں داخل ہونے میں کامیاب ہوگئے تھے جہاں انہوں نے پیٹرول بم پھینکےلیکن بروقت فوجی

کاروائی پر شرپسندوں کی جانب سےعمارت کا محاصرہ کرنے کی کوشش کو ناکام بنا دیا گیا۔ اس دوران ایک پولیس آفیسر آنسو گیس کا شیل پھٹنے سے موقع پر ہی ہلاک ہوگیا۔

سیکورٹی اہلکار نے راجا پکشے اور اُن کے اہلِ خانہ کو بحفاظت عمارت سے کسی نامعلوم مقام پر پہنچانے کی تصدیق کردی۔

سری لنکا میں معاشی بحران روز مرہ کی اشیاءکی قیمتوں میں اضافے پرپیدا ہوا اوربعدازاں پر تشدد مظاہروں کی صورت اختیار کرگیا۔ مشتعل شہریوں کی طرف سے پرتشدد کاروائیوں اوراحتجاج کے نتیجے میں مہندرا راجا پکشے نے پیر کے روز اپنے منصب سے استعفیٰ بھی دے دیا تھا لیکن اس کے باوجود شرپسندوں کی جلاؤگھیراؤاور پُرتشدد کاروائیاں تاحال جاری ہیں جس میں اب تک ایک رکن اسمبلی سمیت 7 افراد مارےگئے ہیں۔ 

صورتحال کو مزید بگڑنے سے بچانے کےلئےعائد کرفیومیں بدھ تک توسیع کردی گئی۔ کرفیو اس وقت لگا جب ایک لائیو ٹیلی ویژن چینل پر حکومت کے حامیوں کی فوٹیج میں لاٹھیوں سے مسلح دکھایا گیا جو دارالحکومت کے کئی مقامات پر مظاہرین کو پیٹ رہے تھے۔راجا پکشے کے استعفیٰ کے بعد مظاہرین سری لنکا کے صدر گوتا بایا راجا سے بھی استعفیٰ کا مطالبہ کررہے ہیں۔

واضح رہے کہ صدر گوتا بایا راجا سبکدوش ہونے والے وزیر اعظم راجا پکشے کے بھائی ہیں۔غیرملکی ٹی وی کے مطابق مشتعل مظاہرین سے نپٹنےکےلئے تمام حساس مقامات پرآنسو گیس اورواٹر کینن سےمسلح فوجی دستےتعینات کردیے گئےہیں۔  

سری لنکا میں اس وقت شہریوں کومعاشی بحران کا ہی نہیں بلکہ بجلی کی قلت کا بھی سامنا کرنا پڑرہا ہے۔ سری لنکا میں اقتصادی بحران جزوی طور پر غیر ملکی کرنسی کے ذخائر میں کمی کی وجہ سے پیدا ہوا۔