تحریک انصاف  آج صوابی میں عوامی طاقت کا مظاہرہ کرے گی 

جی این این کے مطابق گوہاٹی اسٹیڈیم صوابی میں تحریک انصاف آج جلسہ کرے گی ، عمران خان  کے لیے 60 فٹ لمبا اور 30 فٹ چوڑا اسٹیج تیارکرلیا گیا ۔

جلسے میں عمران خان کے ساتھ پی ٹی آئی کی دیگر اہم شخصیات بھی شرکت کریں گی۔ جلسے کے لیے سکیورٹی کے بہترین انتظامات کیے گئے ہیں ،سکیورٹی کے لیے ایک ہزار 669 اہلکار تعینات ہو نگے۔ 

خیال رہے کہ گزشتہ روز تحریک انصاف نے فیصل آباد میں جلسہ کیا تھا ، عوامی اجتماع سے خطاب کرتے ہوئے چئیرمین تحریک انصاف عمران خان کاکہنا تھا کہ  میرے خلاف سازش تیار کی جارہی ہے ، اگر خدانخواستہ مجھےکچھ ہوا تو پاکستان کے عوام نے مجھے انصاف دلانا ہے ۔

انہوں نے کہا کہ چھ دن پہلے معلوم ہوا کہ میرے خلاف بند کمروں میں سازش ہورہی ہے، یہ سوچتے رہے اس کے ساتھ ہم نے اتنا کیا لیکن یہ بچ کر نکل گیا، امریکہ میں میرے خلاف سازش تیار کی گئی، یہاں کے میرجعفر اور صادق نے سازش پر عمل کیا۔

سابق وزیر اعظم نے کہا کہ فیصل آباد کے لوگوں کا جنون دیکھ کر اللہ کا شکر ادا کرتا ہوں، 2018ء میں فیصل آباد میں ٹیکسٹائل کی صنعت بند ہورہی تھی، فیصل آباد میں فیکٹریاں بند کرکے ہاؤسنگ سوسائٹیز بنائی جارہی تھیں ، ہماری حکومتی پالیسیوں کے بعد فیصل آباد کی صنعتوں نے اب تمام ریکارڈ توڑ دیے، فیصل آباد میں روزگار کے مواقع بڑھے، مالکان کے پاس مزدوروں کی کمی ہوگئی ہے، یہاں کی صنعتوں نے ریکارڈ برآمدات کیں، فیصل آباد کی ترقی اور خوشحالی پاکستان کی خوشحالی ہے، آج ملک کی تاریخ کی سب سے زیادہ برآمدات ہیں، میں نیا پاکستان بنتے دیکھ رہا ہوں۔