وزیراعظم شہباز شریف کی عمران خان کو فول پروف سیکیورٹی فراہم کرنے کی ہدایت

تفصیلات کے مطابق وزارت داخلہ کی جانب سے وزیر اعظم شہبازشریف  کو عمران خان کی سیکیورٹی پر تفصیلی بریفنگ دی گئی۔ 

وزیراعظم نے وزیرداخلہ کو عمران خان کو بہترین سیکیورٹی فراہم کرنے کی ہدایت کی۔وزیراعظم نے ہدایت کی کہ عمران خان کو فوری طور پر چیف سیکیورٹی آفیسر فراہم کیا جائے۔

وزیرِ اعظم نے  تمام صوبائی حکومتوں کو بھی چیئرمین پی ٹی آئی عمران خان کو جلسے جلوسوں کے دوران سیکیورٹی فراہم کرنے کی ہدایت کردی۔

ترجمان وزارت داخلہ کی جانب سے بھی بتایا گیا کہ وزارت داخلہ کےاحکامات کی روشنی میں سابق وزیراعظم عمران خان کی فُول پروف سکیورٹی کو یقینی بنایا گیا ہے۔پولیس اور دیگر قانون نافذ کرنے والے اداروں کو سابق وزیراعظم کیلئے مقررسکیورٹی فورسز کی تعیناتی پرمکمل عملدرآمد کیلئے کہا گیا ہے۔

سابق وزیراعظم عمران خان کے بنی گالہ ہاؤس کی سیکیورٹی کیلئے پولیس اورایف سی کے 94اہلکارتعینات کئے گئے ہیں۔اسلام آباد پولیس کے 22 جبکہ ایف سی کے 72 اہلکار شامل ہیں۔خیبرپختونخوا پولیس کی جانب سے 36 اہلکاروں کو بھی عمران خان کی سیکورٹی کے لیے تعینات کیا گیا۔ 

وزارت داخلہ کے زیرنگران تھریٹ اسیسمنٹ کمیٹی سابق وزیراعظم عمران خان کی سکیورٹی سے متعلق معاملات کامسلسل جائزہ لے رہی ہے۔