حکومت آئینی مدت پوری کرے گی، وزیراعظم کی زیر صدارت اجلاس میں فیصلہ

میڈیا ذرائع کے مطابق وزیر اعظم شہباز شریف کی زیر صدارت اجلاس میں مولانا فضل الرحمان، آصف علی زرداری، خالد مقبول صدیقی کے علاوہ وفاقی وزراء اعظم نذیرتارڑ، خواجہ آصف، سعد رفیق اورمریم اورنگزیب نے بھی شرکت کی۔

وزیر اعظم ہاؤس میں ہونے والے اجلاس میں ملکی سیاسی و معاشی صورت حال پر غور و فکر کے ساتھ ساتھ اہم فیصلے کیے گئے ہیں۔

ذرائع کے مطابق اتحادی جماعتوں نے عمران خان کا فوری الیکشن کا مطالبہ مسترد کرتے ہوئے کہا کہ حکومت اگست 2023ء تک اپنی آئینی مدت پوری کرے گی۔

اجلاس میں سپیریم کورٹ کے فیصلے کے بعد پنجاب کی صورت حال پر بھی غور کیا گیا، اس ضمن میں یہ فیصلہ ہوا کہ سپریم کورٹ کے فیصلے پر باقاعدہ ردعمل سے قبل قانونی ماہرین اور اٹارنی جنرل سے رائے لی جائے گی۔

علاوہ ازیں اجلاس میں اتحادیوں کی جانب سے ملکی معیشت کے استحکام کی خاطر فوری اقدامات کا مطالبہ کیا گیا اور الیکشن سے قبل اصلاحات کا عمل بھی جلد مکمل کرنے پر زور دیا گیا۔