وزیر خارجہ اپنے چینی ہم منصب کی دعوت پر آج چین کا دورہ کریں گے

تفصیلات کے مطابق گزشتہ ماہ وزیر خارجہ کا عہدہ سنبھالنے کے بعد بلاول بھٹو زرداری کا یہ چین کا پہلا دورہ ہوگا۔ خارجہ امور کی وزیر مملکت اور دوسرے حکام وزیر خارجہ کے وفد میں شامل ہوں گے۔

 وزیر خارجہ اپنے دورے کے موقع پر چین کے سٹیٹ قونصلر اور وزیر خارجہ وانگ ژی کے ساتھ خصوصی مشاورت کریں گے ۔  دونوں رہنما دوطرفہ تعلقات کے تمام پہلوئوں کا جائزہ لیں گے جن میں خصوصاً پاکستان اور چین کے درمیان مستحکم تجارتی اور اقتصادی تعاون پر توجہ مرکوز کی جائے گی ۔

چین پاکستان اقتصادی راہداری منصوبے پر تیزی سے پیشرفت اور صدر شی جن پنگ کا فلیگ شپ منصوبہ ایک خطہ ایک سڑک اقدام بھی مشاورت کا حصہ ہوگا ۔ دونوں فریق بڑے علاقائی اور عالمی معاملات پر بھی تفصیلی تبادلہ خیال کریں گے۔ 

وزیر خارجہ بلاول بھٹو زرداری یہ دورہ پاکستان اور چین کے سفارتی تعلقات کے قیام کے 71 سال مکمل ہونے کے موقع پر کررہے ہیں۔