حکومت نے جنگ کا اعلان کردیا : فواد چوہدری

تفصیلات کے مطابق میڈیا سے گفتگو کرتے ہوئے فواد چوہدری نے کہا کہ شیریں مزاری پر تشدد کیا گیا، کپڑے پھاڑے گئے اور بہیمانے طریقے سے گاڑی میں لے جایا گیا۔

فواد چوہدری نے کہا کہ اس کو گرفتاری نہیں اغواء کہا جائے گا، ہمیں نہیں پتہ کہ وہ اس وقت کہاں ہیں ؟  اُنہوں نے مزید کہا کہ اب اگر لڑائی ہونی ہے تو لڑائی ہی ہونی ہے ۔ یہ تحریک کی سب سے پہلی اور بڑی گرفتاری ہے ، ہمارے وکلا اسلام اباد ہائیکورٹ میں درخواست دائر کریں گے۔ عمران خان کچھ دیر بعد اس پر بات کریں گے، کہہ رہے ہیں کہ 700 افراد کی فہرست بنائی گئی ہے۔ 

انہوں نے کہا کہ جب گیدڑ کی موت آتی ہے تو وہ شہر کی طرف دوڑتا ہے، جب حکومتوں کی موت آتی ہے تو وہ اس طرح کی حرکتیں کرتی ہیں۔ ان کو پاکستان میں امن و امان کی بھی پرواہ نہیں ہے ۔ 

دوسری جانب پی ٹی آئی رہنما شبلی فراز نے کہا کہ حکومت اتنی بوکھلا گئی ہے کہ پہلا وار ہماری خاتون لیڈر پر کیا ، شیریں مزاری ملک کا سرمایہ ہے، ان کو بہیمانہ طریقے سے گھسیٹ کر اغواء کیا گیا، یہ حواس باختہ ہو گئے،جس طرح شیریں مزار کو اغوا کیا گیا اس کی مذمت کرتے ہیں۔جلداپنے لائحہ عمل کا اعلان کریں گے۔