بھارتی عدالت نےحریت رہنما یاسین ملک کوعمر قید کی سزا سنادی

بین الاقوامی میڈیا رپورٹس کے مطابق بھارتی عدالت نے حریت رہنما یٰسین ملک کو 19 مئی کو دہشتگردی کی فنڈنگ کے مقدمے میں مجرم قرار  دیا تھا۔

بتایا گیا ہے کہ محمد یٰسین ملک نئی دہلی میں واقع تہاڑ جیل میں عرصہ دراز سے قید ہیں، انہون نے کمرہ عدالت میں جج سے مکالمہ کرتے ہوئے کہا کہ ’میں بھیک نہیں مانگوں گا، آپ کو جو  سزا دینی ہے دے دیجیے۔

انہوں نے عدالت میں کہا کہ میرے کچھ سوالات کا جواب دیجیے، میں دہشت گرد تھا تو بھارت کے7 وزرائے اعظم مجھ سے ملنے کشمیر کیوں آتے رہے؟۔

یٰسین ملک نے جج سے مکالمے میں کہا کہ اگر میں دہشتگرد تھا تو کیس کے دوران میرے خلاف چارج شیٹ کیوں نہ فائل کی گئی، میں دہشتگرد تھا تو وزیراعظم واجپائی کے دور میں مجھے پاسپورٹ کیوں جاری ہوا، میں دہشت گرد تھا تو مجھے بھارت اور دیگر ملکوں میں اہم جگہوں پر لیکچر دینے کا موقع کیوں دیاگیا۔ 

عدالت کی جانب سے حریت رہنما یٰسین ملک کے سوالات پر کہا گیا کہ ان باتوں کاوقت گزرگیا ہے، یہ بتائیں آپ اس تجویز کردہ سزا پر کیا کہنا چاہتے ہیں؟ جس پر یٰسین ملک کا کہنا تھا کہ ’میں عدالت سے بھیک نہیں مانگوں گا، جوعدالت کو ٹھیک لگتا ہے وہ فیصلہ کرے۔‘