پاکستان کی بی جےپی رہنما کے توہین آمیزبیان کی شدید مذمت

ترجمان دفترخارجہ کا کہنا ہے کہ دنیابھرميں کروڑوں مسلمانوں کےجذبات کوٹھیس پہنچی، بی جے پی کی وضاحت کی کوشش مسلمانوں کادرددورنہیں کرسکتی۔

ترجمان کے مطابق مسلمان بی جےپی کےنفرت انگیزتبصروں پرسخت غصےمیں ہیں، بھارتی مسلمانوں کیخلاف تشدد،نفرت میں اضافےپرگہری تشویش ہے۔

بیان میں مزید کہا گیا ہے کہ بھارت اقلیتوں کی حفاظت،سلامتی اوربہبودکویقینی بنائے، عالمی برادری بھارت میں اسلاموفوبیاکی سنگین صورتحال کانوٹس لے۔

دوسری جانب صدرمملکت ڈاکٹر عارف علوی اور وزیراعظم شہبازشریف نے بھی بی جے پی رہنما کی گستاخانہ بیان کی شدید مذمت کی ہے۔

صدرمملکت ڈاکٹر عارف علوی کا کہنا ہے کہ مودی کے نفرت انگیزفلسفہ اقلیتوں کی مذہبی آزادی کوپامال کررہے ہیں، ایسے بیانات مزید تعصب،تشدد اور نفرت کاباعث بن سکتے ہیں۔

ڈاکٹر عارف علوی کا کہنا تھا کہ متنازع بیانات بھارت میں اسلاموفوبیا کے بڑھتےرجحان کےعکاس ہیں، بی جےپی کو انتہاپسندہندوتوا نظریے سے کنارہ کشی اختیارکرنا ہوگی۔

وزیراعظم شہبازشریف کا کہنا تھا کہ ہمارے لیے نبی کریم ﷺکی محبت سے بڑھ کر کچھ نہیں، مسلمان نبی کریم ﷺ کی محبت،ناموس کیلئےزندگی قربان کرسکتے ہیں۔

شہبازشریف کا کہنا تھا کہ بھارت میں مسلمانوں پر شدید ظلم و ستم جاری ہے، دنیا بھارتی انتہا پسندی کا نوٹس لے۔

خیال رہے کہ بھارتی حکمراں جماعت بی جے پی کے انتہاپسند ونگ کی اہم رکن نوپور شرما کی جانب سے توہین رسالت کی ناپاک جسارت کا ارتکاب کیا گیا جس پر دنیا بھر کے مسلمانوں میں غم وغصے کی لہر دوڑ گئی۔

ٹوئٹر پر بائیکاٹ انڈیا کے نعرے بلند ہونے لگے، عرب دنیا کے مسلمانوں نے بھی اپنے شدید ردعمل کا اظہار کیا ہے اور سعودی عرب میں بھی یہ ٹرینڈ ٹاپ پر ہے۔

واقعے کے خلاف اترپردیش کے ضلع کانپور میں شدید احتجاج دیکھا گیا اور ہڑتال کی گئی۔ مشتعل افراد کی جانب سے پتھراؤ کے واقعات سامنے آئے، پولیس نے ہنگامہ آرائی کے الزام میں 17 افراد کو حراست میں لے لیا۔

بھارتی وزیراعظم نریندر مودی نے اس معاملے پر روایتی انداز میں مجرمانہ خاموشی اختیار کررکھی ہے اور کسی بھی قسم کی معذرت سے گریز کیا ہے۔

نوپورشرما بی جے پی کے ترجمان کے عہدے پر کام کررہی ہیں اور انہیں نریندر مودی کا انتہائی قریبی سمجھا جاتا ہے۔ بی جے پی نے نوپور شرما کے بیان پر انکی پارٹی رکنیت معطل کردی ہے جبکہ ان کے خلاف مذہبی جذبات مجروح کرنے کے الزامات کے تحت مقدمہ بھی درج کرلیا گیا ہے۔