امریکہ میں فائرنگ کے واقعات بڑھ گئے، تازہ حملوں میں چھ افراد ہلاک

امریکہ کی ریاستوں پنسلوانیا اور ٹینیسی میں بڑے پیمانے پر فائرنگ کے نتیجے میں کم از کم چھ افراد ہلاک اور 25 سے زائد زخمی ہو گئے ہیں۔
برطانوی خبر رساں ایجنسی روئٹرز کے مطابق سنیچر کو فلاڈیلفیا کی مصروف ساؤتھ سٹریٹ، بارز اور ریستورانوں سے بھرے ہوئے علاقے میں حملہ آوروں نے فائرنگ کی۔

حکام نے بتایا کہ فائرنگ کے نتیجے میں دو مرد اور ایک خاتون ہلاک ہو گئے۔
ویڈیو میں ایک پُرہجوم سڑک پر گولیاں چلنے کے بعد لوگوں کو گھبراہٹ کے عالم میں بھاگتے ہوئے دیکھا جا سکتا ہے۔
اسی طرح ٹینیسی کے شہر چٹانوگا میں جب لوگ سنیچر کی رات کا لطف اٹھا رہے تھے، آدھی رات گزرنے کے بعد فائرنگ کا واقعہ پیش آیا۔
فائرنگ کے دونوں واقعات میں کسی مشتبہ شخص کو حراست میں نہیں لیا جا سکا۔
امریکی ریاست مشی گن کی مقامی نیوز ویب سائٹ ایم لائیو ڈاٹ کام نے ساگیناو پولیس کا حوالہ دیتے ہوئے رپورٹ کیا کہ اتوار کی صبح فائرنگ کے ایک اور واقعے میں مشی گن کے شہر ساگینا میں تین افراد ہلاک ہو گئے۔
حکام نے بتایا کہ چٹانوگا میں پیش آنے والے فائرنگ کے واقعے میں تین افراد ہلاک اور 14 زخمی ہوئے۔
تحقیقی گروپ گن وائلنس آرکائیو کے مطابق رواں سال اب تک ریاست ہائے متحدہ میں بڑے پیمانے پر کم از کم 240  فائرنگ کے واقعات رپورٹ ہو چکے ہیں۔
فلاڈیلفیا پولیس نے سنیچر کی رات پرہجوم ساؤتھ سٹریٹ میں فائرنگ کے تین واقعات کی اطلاع دی۔

دوسرے واقعے کے بارے میں پولیس کا خیال ہے کہ دو مردوں نے پہلے ایک دوسرے زدوکوب کیا اور پھر گولی چلائی۔ ان میں سے ایک شخص فائرنگ سے مارا گیا۔
ایک پولیس افسر نے ایک شخص کو بھیڑ میں فائرنگ کرتے ہوئے دیکھا اور اس پر گولی چلا دی۔
فلاڈیلفیا کے پولیس کمشنر ڈینیئل آؤٹ لا نے ایک نیوز کانفرنس کو بتایا کہ ’پولیس کا خیال ہے کہ گولی چلانے والا شخص زخمی ہو گیا تھا لیکن اس کے باوجود وہ ہجوم میں سے فرار ہو گیا۔
ڈینیئل آؤٹ لا کا کہنا تھا کہ ’ہم نہ صرف گذشتہ رات بلکہ شہر میں مجموعی طور پر پیش آنے والے فائرنگ کے واقعات کی تہہ تک پہنچنے کے لیے دستیاب وسائل استعمال کر رہے ہیں۔‘
فائرنگ سے ہلاک ہونے والے افراد کی عمریں 22، 27 اور 34 سال جبکہ زخمیوں کی عمریں 17 سے 69 سال کے درمیان تھیں۔
گذشتہ ماہ کے اواخر میں امریکہ کی ریاست ٹیکساس کے ایک سکول میں نوجوان نے فائرنگ کر کے 19 بچوں سمیت 20 افراد کو ہلاک کر دیا تھا۔
بفیلو کی سپر مارکیٹ میں 10 سیاہ فام افراد فائرنگ سے ہلاک ہوئے تھے جبکہ بدھ کو اوکلاہوما سٹی سے تقریباً 160 کلومیٹر شمال مشرق میں واقع شہر تلسا کے ایک میڈیکل سینٹر میں فائرنگ سے چار افراد ہلاک ہوئے تھے۔
فائرنگ کے حالیہ واقعات کے بعد امریکی صدر جو بائیڈن نے قانون سازوں سے اسلحے کی روک تھام کے لیے سخت قوانین منظور کرنے کی اپیل کی تھی۔
صدر جو بائیڈن نے اپنی اپیل میں حملے میں استعمال ہونے والے ہتھیاروں پر پابندی کا بھی مطالبہ کیا تھا۔