برطانوی وزیر اعظم کیخلاف تحریک عدم اعتماد ناکام 

غیر ملکی میڈیا رپورٹس کے مطابق بورس جانسن کو اپنی جماعت کنزرویٹو پارٹی کے ارکان کی جانب سے تحریک عدم اعتماد کا سامنا تھا۔

برطانوی وزیر اعظم کے خلاف عدم اعتماد کی ووٹنگ ہاؤس آف کامنز میں ہوئی ۔ ووٹنگ کا عمل پاکستانی وقت کے مطابق رات تقریباً 10 بجے شروع ہوا جو 12 بجے تک جاری رہا ۔ عدم اعتماد پر ووٹنگ کا نتیجہ پاکستانی وقت کے مطابق رات ایک بجے سامنے آیا۔

برطانوی میڈیا کے مطابق 211 کنزرویٹو ارکان نے وزیر اعظم کے حق میں اور 148 نے مخالفت میں ووٹ دیا ۔ تحریک عدم اعتماد کی کامیابی کیلئے 180 ووٹ درکار تھے۔

غیر ملکی میڈیا کے مطابق اب ایک سال  تک بورس جانسن کے خلاف دوبارہ تحریک عدم اعتماد پیش نہیں لائی جا سکے گی ۔

وزیراعظم کی کابینہ کی ٹیم میں شامل کئی وزرا نے ان سے یکجہتی کا اظہار کیا۔  بورس جانسن کے علاوہ کابینہ کے ارکان سمیت اراکین پارلیمنٹ تحریک کو ناکام بنانے کیلئے دن بھر سرگرم رہے۔

خبر ایجنسی کے مطابق 2019 میں وزیر اعظم کے عہدے کا حلف اٹھانے والے  بورس جانسن پارٹی گیٹ اسکینڈل پر دباؤ کا شکار ہیں ۔  اے ایف پی کے مطابق پارٹی گیٹ سکینڈل کے بعد مشکلات میں پھنسے برطانوی وزیراعظم کئی مہینوں سے اقتدار پر اپنی گرفت کو برقرار رکھنے کی کوشش میں ہیں ۔

وہ پہلے برطانوی وزیراعظم ہیں جو قانون کی خلاف ورزی کرتے ہوئے پائے گئے ۔  برطانوی وزیراعظم اعتماد کا ووٹ اگر  ہار جاتے تو انہیں وزیراعظم اور پارٹی کے سربراہ کے طور پر سبکدوش ہونا پڑتا۔

خیال رہے کہ اس سے قبل سابق برطانوی وزیراعظم  تھریسامے 2018 میں تحریک عدم اعتماد سے بچ گئی تھیں لیکن ان کے اختیارات پہلے جیسے نہیں رہے جس کے بعد انہوں نے کچھ  مہینوں کے اندر ہی اپنے عہدے سے استعفیٰ دے دیا تھا۔