عدالت نے ڈاکٹر عامر لیاقت کا پوسٹ مارٹم کرانے کا حکم دے دیا

کراچی: جوڈیشل مجسٹریٹ شرقی نے ڈاکٹر عامر لیاقت کا پوسٹ مارٹم کرانے کا حکم دے دیاہےاور پولیس کو عدالتی احکامات پر عملدرآمد کرانے کی ہدایات کر دی ۔

تفصیلات کے مطابق جوڈیشل مجسٹریٹ شرقی نے شہری کی جانب سے ڈاکٹر عامر لیاقت کے پوسٹمارٹم کروانے کی درخواست پر سماعت کی ،پولیس کی جانب سے کہا گیا تھا کہ جسم کے اندرونی اعضا کا جائزہ لیے بغیر موت کا تعین نہیں کیا جا سکتا، جس پر سرکاری وکیل نے موقف اختیار کیا کہ مرحوم کے لواحقین کو کسی پر شبہ نہیں ،

اس لیے وہ پوسٹ مارٹم نہیں کرانا چاہتے لیکن شہری کی جانب سے درخواست میں موقف اختیار کیا گیا تھا کہ ڈاکٹر عامر لیاقت مشہور شخصیت ہیں اور شبہ ہے کہ جائیداد کے تنازعے پر ان کا قتل کیا گیا ہے جس سے کراچی کے شہریوں میں شدید اضطراب پایا جا رہا ہے اس لیے ان کی موت کا تعین کرنا ضروری ہے جس پر عدالت نے فریقین کے دلائل سننے کے بعد فیصلہ محفوظ کر لیا تھا جبکہ اب عدالت نے پولیس کو حکمنامہ جاری کیا ہے کہ ڈاکٹر عامر لیاقت کا پوسٹ مارٹم کیا جائے ۔