آشیانہ ، رمضان شوگر ملز ریفرنس: وزیر اعظم کی مستقل حاضری معافی کی درخواست منظور 

تفصیلات کے مطابق احتساب عدالت  نے وزیر اعظم شہبازشریف کو بڑا ریلیف  دے دیا ،  عدالت نے رمضان شوگر ملز ریفرنس من مستقل حاضری معافی کی درخواست منظور کرلی ۔

احتساب عدالت لاہور میں وزیراعظم شہباز شریف اور وزیراعلی حمزہ شہباز کے خلاف رمضان شوگر ملز ریفرنس کی سماعت ہوئی ،  شہباز شریف نے عدالت کے روبرو پیش ہوکر حاضری مکمل کروائی، ان کی مستقل حاضری معافی کی درخواست پر وکیل نے دلائل کے مکمل کئے۔ 

شہباز شریف کے وکیل نے استدعا کی کہ شہباز شریف کے نمائندے محمد نواز کو انکی جانب سے حاضری کے لیے مقرر کیا جائے ،شہباز شریف وزیراعظم پاکستان ہیں انہوں نے کبھی ضمانت کا غلط استعمال نہیں کیا۔

شہباز شریف نے معزز عدالت کے روبرو اپنا موقف بیان کرتے ہوئے کہا کہ بلاجواز حاضری معافی کی درخواست دائر نہیں کی ، قومی ذمہ داریاں ادا کرنی ہیں ، حاضری معافی کی درخواست مسترد ہوگی تو پھر بھی پیش ہوں گا، میرے ترقیاتی کاموں کے حقائق آپکے سامنے ہیں۔

وزیراعظم شہباز شریف نے فاضل جج کو ترقیاتی کاموں پر مبنی کتابچہ دے دیا ، ان کا کہنا تھا کہ مجھ پر 15کروڑ روپے سے نالا تعمیر کرانےکا الزام ہے، ایسےکروڑوں روپےکے نالے میں نے پورے پنجاب میں بنوائے ، مجھے 15 یا 18 کروڑ کی کرپشن کرنی ہوتی تو یہ کام نہ کرتا۔

وزیراعظم نے مزید کہا کہ گنے کے ایتھنول پر میں نے ٹیکس لگایا ، شوگر ملز مالکان نے ہائیکورٹ میں درخواست دائر کردی ، میرے بیٹے کی شوگر مل بھی ہے جہاں ایتھنول پر ٹیکس عائد کیا، میرے بیٹے کی شوگر مل کو ڈھائی ارب روپےکا نقصان پہنچا۔

اس موقع پر نیب پراسکیوٹر نے شہباز شریف کی مستقل حاضری معافی کی درخواست کی مخالفت کرتے ہوئے کہا کہ شہباز شریف کو مستقل حاضری معافی دینے کی ٹھوس وجوہات نہیں ہیں ۔ 

عدالت نے شہباز شریف کو کمرہ عدالت سے جانے کی اجازت دے دی جس کے بعد وہ عدالت سے روانہ ہوگئے، بعد ازاں احتساب  عدالت    کے جج ساجد اعوان  نے وزیراعظم شہباز شریف کی مستقل حاضری معافی کی درخواست منظور کرنےکا فیصلہ سنادیا۔