ٹرینوں کے کرایوں میں دوسری بار اضافہ  

محکمہ ریلوے کی جانب سے جاری نوٹیفکیشن کے مطابق ریلوے نے مختلف روٹس پر مسافر اور فریٹ ٹرینوں کے کرائے بڑھانے کا فیصلہ کیا ہے،  اس اضافے کا اطلاق آج سے ہوگا۔

پیٹرولیم مصنوعات کی قیمتوں میں اضافےکےباعث ریلوے کے کرایوں میں اضافے کا نوٹیفکیشن ہفتے کو جاری کیا گیا تھا۔ 

نوٹی فکیشن کے مطابق مسافرٹرینوں کے لیے کرائےمیں 5 فیصد اور مال بردار ٹرینوں کے کرایوں میں 10 فیصد اضافہ کیا گیا ہے۔

پاکستان ریلوے ذرائع کے مطابق پاک بزنس ٹرین کا لاہور سے کراچی کا کرایہ 2250 روپے ہوگیا، اے سی لوئر کا کرایہ 4150 روپےجبکہ  اے سی بزنس کلاس کا کرایہ 5700 اور  اے سی سلیپر کا کرایہ 8050 روپے ہوگیا ہے۔ 

لاہور سے کوئٹہ جانے والی جعفر ایکسپریس کی اکانومی کلاس کا نیا کرایہ 1850 روپے جبکہ  اے سی لوئر کا کرایہ 3950 ، اے سی بزنس کلاس کا کرایہ 4250 اور اے سی سلیپر کا کرایہ 6200 روپے ہوگیا ہے۔

واضح رہے کہ ملک بھر میں پیٹرولیم مصنوعات کی قیمتوں میں ایک بار پھر اضافہ  ہوا ہے ،جس  کے بعد پیٹرول کی نئی قیمت 233 روپے 89 پیسے ہو گئی ہے ۔