لیجنڈری کرکٹر ظہیر عباس کی طبیعت ناساز، آئی سی یو منتقل

تفصیلات کے مطابق خاندانی ذرائع کا کہنا تھا کہ ظہیر عباس کو 3 دن قبل اسپتال میں داخل کیا گیا تھا اور وہ آکسیجن پر ہیں ۔

ذرائع نے بتایا کہ ظہیر عباس نے آج اشاروں کی مدد سے بیٹی سے سلام دعا کی ۔ ظہیر عباس ڈائلیسز پر ہیں اور کمزوری محسوس کر رہے ہیں جبکہ ان سے ملاقات پر پابندی ہے۔

سابق کپتان کے اہلِ خانہ نے کرکٹ لیجنڈ  کی صحتیابی کے لیے مداحوں سے دعاؤں کی درخواست کی ہے۔   ظہیر عباس لندن جاتے ہوئے دبئی میں قیام کے دوران کورونا میں مبتلا ہوئے تھے،  لندن پہنچنے کے بعد نمونیا ہوا اور پھر گردوں کی تکلیف ہوئی۔

یاد رہے کہ ظہیر عباس دل کے عارضہ میں بھی مبتلا ہیں 2018 میں انجیو گرافی کے بعد ان کے دل میں دو اسٹنٹ ڈالے گئے تھے۔

واضح  رہے کہ 74سالہ ظہیر عباس نے اپنے کیریئر میں 78 ٹیسٹ اور 62 ون ڈے میچز میں پاکستان کی نمائندگی کی ہے ، اس دوران انہوں نے کئی یادگار اننگز بھی کھیلیں ۔