آئندہ ماہ سے مرحلہ وار مہنگی ہونے والی بجلی کی فی یونٹ نئی قیمت بتادی گئی

ملک میں آئندہ ماہ سے مرحلہ وار مہنگی ہونے والی بجلی کی فی یونٹ نئی قیمت بتادی گئی ، یکم جولائی سے یکم اکتوبر تک بجلی کا ایک یونٹ 16.91روپے سے بڑھ کر 24 روپے 82 پیسے کا ہو جائے گا ،

ماہانہ 200 یونٹ یا اس سےکم بجلی استعمال کرنے والے صارفین پر اس اضافے کا اطلاق نہیں ہوگا۔جیو نیوز کی رپورٹ میں ذرائع پاور ڈویژن کا حوالہ دیتے ہوئے بتایا گیا ہے کہ یکم جولائی سے فی یونٹ بجلی 3 روپے 50 پیسے مہنگی ہو گی ، جس کے نتیجے میں یکم جولائی سے بجلی کا ایک یونٹ 16.91 روپے سے مہنگا ہو کر 20.41 روپے کا ہوجائے گا۔ 

ذرائع کے حوالے سے معلوم ہوا ہے کہ یکم اگست سے فی یونٹ بجلی مزید ساڑھے 3 روپے مہنگی ہوجائے گی جس کے بعد یکم اگست سے بجلی کا بنیادی ٹیرف بڑھا کر 23.91 روپے فی یونٹ کردیا جائے گا جب کہ یکم اکتوبر 2022 سے بجلی کی قیمتیں ایک بار پھر بڑھیں گی ، اس وقت 91 پیسے فی یونٹ اضافہ کیا جائے گا جس کے نتیجے میں یکم اکتوبر سے بجلی کا فی یونٹ مہنگا ہوکر عوام کو 24 روپے 82 پیسے کا پڑے گا۔ 

علاوہ ازیں حکومت کی جانب سے وفاقی اور صوبائی محکموں میں بجلی بچت مہم شروع کرنے کا فیصلہ کرلیا گیا ، اقدام کا مقصد بجلی کی 30 فیصد ماہانہ بچت یقینی بنانا ہے ، اس مہم کے لیے تمام محکموں کے سیکرٹریز اپنے محکموں سے متعلق بجلی بچت کا پلان دیں گے تاہم اس وقت گریڈ 17 سے 20 تک کے افسران کے دوران ڈیوٹی 3 گھنٹے اے سی بند رکھنے کی تجویز سامنے ہے جب کہ گریڈ ایک سے 16 تک کے دفاتر میں اے سی کے استعمال پر مکمل پابندی پر بھی غور کیا جارہا ہے۔ 

ادھر صوبہ پنجاب کے دارالحکومت لاہور میں کاروباری اوقات محدود کرنے کے فیصلے پر سختی سے عملدرآمد کرانے کا فیصلہ کرلیا گیا ، سرکاری عملے ، لیبر انسپکٹرز اور دیگر ادروں کے تعاون سے کاروباری مراکز کو مقررہ وقت پر بند کرایا جائے گا ، ڈپٹی کمشنر نے تاجروں سے مقررہ وقت پر دکانیں بند کرنےکے لیے ضلعی انتظامیہ کے ساتھ تعاون کرنے کی اپیل کردی۔