17سال بعد سوات کے سیدوشریف ائیرپورٹ پر فلائٹ آپریشن بحال

تفصیلات کے مطابق وادی سوات جانیوالے سیاحوں کیلئے طویل انتطار کے بعد بڑی خوشخبری آگئی،   سوات ایئرپورٹ کو پروازوں کے لیے دوبارہ کھول دیا گیا ہے ۔اس سلسلے میں      پی آئی اے کی پروازپی کے640 نے گیارہ بجے سوات ائیر پورٹ پر لینڈ کیا۔وزیر اعلیٰ خیبر پختونخوا اور وفاقی وزیر مراد سعید پہلی فلائٹ میں سفر کیا، طیارے میں 48 مسافر سوار تھے ۔

پی آئی اے کا طیارہ 17 سال بعد صبح 10 بجے اسلام آباد سے سیدو شریف کے لیے روانہ ہوا تھا۔ سول ایوی ایشن اتھارٹی نے فلائٹ آپریشن کے حوالے سے رن وے کی بحالی، آپریشنل اسٹاف کی تعیناتی سمیت دیگر انتظامات مکمل کئے۔

کچھ عرصے سے شمالی علاقہ جات کے ہوائی اڈوں کو فعال کر کے فلائٹ آپریشن بحال کیا جارہا ہے  تاکہ ان علاقوں میں سیاحت کو مزید بڑھایا جا سکے۔سوات کا سیدو شریف ایئر پورٹ اس سلسلے کا چوتھا ائیرپورٹ ہے۔ اس سے پہلے سکردو، گلگت اور چترال کے ہوائی اڈوں کو فضائی سروس کے لیے بحال کیا گیا ہے۔

 اس موقع پر میڈیا سے گفتگو کرتے ہوئے پی آئی اے کے ترجمان کا کہنا تھا کہ 2004 سے سوات میں فضائی آپریشن بند تھا۔ ابتدائی طور پر اسلام آباد سے سوات کے لیے ہفتے میں 2 دن پروازیں چلائی جائیں گی۔ اسلام آباد سے سوات کی فلائٹس کراچی اور لاہور سے  آنےوالی فلائٹس کے ساتھ کنکٹ ہوں گی۔

خیال رہے کہ  سال 2014 میں دہشت گردی کے باعث سیدوشریف ایئرپورٹ کو بند کیا گیا تھا۔