غیر حتمی ،غیر سرکاری نتائج ،سندھ کے 14 اضلاع میں بلدیاتی انتخابات میں پیپلز پارٹی نے میدان مارلیا

کراچی : سندھ کے 14 اضلاع میں بلدیاتی انتخابات کےغیر حتمی غیرسرکاری نتائج کے مطابق پاکستان پیپلز پارٹی نے میدان مار لیا ہے۔

 تفصیلات کے مطابق شہری علاقوں کی میونسپل کمیٹیوں میں اب تک کل 354 میں سے 285 نشستوں کے نتائج سامنے آ چکے ہیں،نتائج کے مطابق پیپلز پارٹی نے میونسپل کمیٹی کی225 نشستیں جیت لی ہیں،گرینڈ ڈیمو کریٹک الائنس (جی ڈی اے )18 نشستوں پرکامیاب  ہوئی ہے جبکہ 19 آزاد امیدواروں نے میدان مارا ہے،پاکستان تحریک انصاف ( پی ٹی آئی )نے 14 اور جے یو آئی نے7 نشستیں حاصل کی ہیں جبکہ دیگر جماعتوں نے 2 نشستوں پر کامیابی حاصل کی۔

ٹاؤن کمیٹیوں  کل 694 نشستوں میں سے پیپلز پارٹی 408 نشستوں پر کامیابی کے ساتھ دیگر جماعتوں سے کافی آگے ہے، جی ڈی اے کے 57 امیدوار اور 61  آزاد امیدوار کامیاب  ہوئے ہیں ،پی ٹی آئی کے10، جے یو آئی کے 7 اور دیگر جماعتوں کے12 امیدوار کام یاب ہوچکے ہیں۔

خیال رہے کہ اتوار کو سندھ کے 14 اضلاع میں بلدیاتی انتخاب ہوئے، اس دوران دن بھر کہیں گولیاں، کہیں لاٹھیاں چلیں ، کہیں پورا عملہ ہی اغوا کرلیا گیا، بلدیاتی انتخاب کے دوران سانگھڑ، نوشہروفیروز، خیرپور، جیکب آباد، سکھر اورکندھ کوٹ کے متعدد پولنگ سٹیشن میدان جنگ بن گئے ، سیاسی جماعتوں کےکارکنوں اور مخالف گروہوں میں مارا ماری ہوئی ، پرتشدد واقعات میں 2 افراد جاں بحق اور درجنوں زخمی ہوگئے۔

خراب حالات کے باعث کئی مقامات پر پولنگ روکنا پڑی،کندھ کوٹ کے ایک پولنگ سٹیشن کے عملے کو ڈاکوؤں نے اغوا کرلیا ، 7گھنٹے بعد عملہ بازیاب کرایا گیا تو پولنگ شروع ہوئی تاہم بعد میں الیکشن کمیشن نے  الیکشن ملتوی کرنےکا اعلان کرتے ہوئےکہا کہ  یوسی 28 پر ووٹنگ کا عمل نئی تاریخ میں کرایا جائےگا۔ نواب شاہ میں سوشل سیکیورٹی  پولنگ سٹیشن پر مسلح افراد نے ہنگامہ آرائی کی اور عملے کو  یرغمال بنا کر انتخابی سامان لے کر فرار ہوگئے ۔

سانگھڑ کی یونین کونسل 63 میں کشیدگی کے باعث پولنگ عملہ بھاگ گیا ، ٹنڈوآدم میں مخالف جماعتوں کے تصادم میں ایک امیدوار کا بھائی جاں بحق اور سکھر میں جاگیرانی برادری میں تصادم سے ایک شخص مارا گیا ،الیکشن کمیشن کی ہدایت پرمتعدد پولنگ سٹیشنز پرپولنگ کا وقت بڑھایا بھی گیا۔