سینئر صحافی و تجزیہ کار ایاز امیر پر نامعلوم افراد کا حملہ

تفصیلات کے مطابق نجی نیوز چینل سے منسلک سینئر صحافی و تجزیہ کار ایاز امیر پر نامعلوم افراد نے حملہ کیا جس سے وہ زخمی ہوگئے جبکہ حملہ آور ان کا موبائل فون اور پرس بھی چھین کر لے گئے۔

سابق وزیر اعظم عمران خان نے اپنے ٹوئیٹ میں واقعے کی شدید مذمت کرتے ہوئے کہا کہ شہریوں، صحافیوں اور حزب اختلاف کے سیاستدانوں کےساتھ روا رکھے جانے والے تشدد اور جعلی پرچوں کےساتھ پاکستان فسطائیت کی بدترین دلدل میں اتر رہاہے، جب ریاست اخلاقی بالادستی کھو دیتی ہےتو تشدد پر اتر آتی ہے۔

وزیر اعلیٰ پنجاب حمزہ شہباز نے اپنے ایک ٹوئیٹ میں کہا کہ سینئر صحافی اور کالم نگار جناب ایاز امیر صاحب پر ہونے والا حملہ افسوسناک اور قابل مذمت ہے، ذمہ داران کا پتا چلانے کے لیے تمام قانونی راستے اپنائے جائیں گے۔

واقعے پر وزیراعظم شہباز شریف اور وزیراعلیٰ پنجاب حمزہ شہباز نے نوٹس لیتے ہوئے رپورٹ بھی طلب کرلی ہے جبکہ سوشل میڈیا پر صارفین کی جانب سے سینئر صحافی پر تشدد کے واقعے کی شدید الفاظ میں مذمت کی جا رہی ہے۔