ن لیگ کا فرح گوگی کے ریڈ وارنٹ جاری کرنے کا اعلان

مسلم لیگ ن کے رہنما عطاءاللہ تارڑ نے کہا ہے کہ بشریٰ بی بی، فرح گوگی اور احسن جمیل ٹرائیکا کے سربراہ عمران خان ہیں، ہم فرح گوگی کے ریڈ وارنٹ جاری کرنے والے ہیں۔

ایوانِ  وزیر اعلیٰ لاہور  میں ملک محمداحمد خان کے ہمراہ پریس کانفرنس کرتے ہوئے مسلم لیگ ن کے رہنما عطاء اللہ تارڑ  نے عمران خان کو چیلنج کیا کہ فرح گوگی اور احسن جمیل گجر کو وطن واپس لائیں دودھ کا دودھ پانی کا پانی ہو جائے گا، عمران خان فرح گوگی کو  واپس کیوں نہیں لاتے؟ ہم فرح گوگی کے ریڈ وارنٹ جاری کرنے والے ہیں۔

انہوں نے کہا کہ عمران خان کو کیا باجوہ صاحب نے کہا تھاکہ کرپشن کرو؟ بشریٰ بی بی، فرح گوگی اور احسن جمیل ٹرائیکا کے سربراہ عمران خان ہیں۔

سابق خاتون اوّل کی جانب سے مخالفین کو غدار قرار دینے کی ہدایت سے متعلق مبینہ آڈیو ٹیپ پر رد عمل دیتے ہوئے صوبائی وزیر ملک احمد خان نے کہا کہ آڈیو ٹیپ سے بیرونی سازش کی حقیقت سامنے آگئی ہے، غداری کے سرٹیفکیٹ بانٹنے والی بشریٰ بی بی ماسٹر مائنڈ ہیں۔

ملک محمد احمد خان نے کہا کہ ’توشہ خان‘ عدم اعتماد کے ذریعے حکومت ختم ہونے پر جنرل باجوہ سے شکوہ کررہے ہیں، وہ ادارے کے سربراہ کو غیر آئینی اقدامات نہ کرنے پر الزام دے رہے ہیں۔

انہوں نے کہا کہ عمران خان نے اپنی حکومت جاتی دیکھ کر اپنے خلاف سازش کا بیانیہ گڑھا، عمران خان کی اہلیہ نے علیم خان اور دیگر سیاسی جماعتوں کے رہنماؤں کو غدار کہنے کی مہم چلوائی، ان کی جانب سے بیرونی سازش کا نام لے کر اندرونی سازش کی گئی۔

ملک احمد خان نے کہا کہ ’مسٹر توشہ خان‘ کے خلاف الزامات کی فہرست بہت لمبی ہے، پنجاب میں لوٹ مار کا بازار گرم کیا گیا، اربوں روپے بزدار اور گوگی کے ذریعے بشریٰ بی بی تک پہنچائے گئے، کیا یہ کرپشن عمران خان کی مرضی کے بغیر ہوسکتی تھی؟

خیال رہے کہ عمران خان کے وزیراعظم کے عہدے سے ہٹتے ہی فرح گوگی دبئی روانہ ہوگئی تھیں جن کے حوالے سے کرپشن کے متعدد اسکینڈلز سامنے آچکے ہیں۔