ارتھ آور، وزیر اعظم ہاؤس کی لائٹس بند کردی گئیں

تفصیلات کے مطابق   زمین سے محبت کے اظہار کا دن ،  پاکستان سمیت دنیا بھر میں آج ارتھ آور منایا جارہا ہے۔ پاکستان میں بھی ایک گھنٹے کے لیے اضافی روشنیاں بند کر دی گئیں۔ ارتھ آور کی مناسبت سے لائٹس ساڑھے 8 سے ساڑھے 9 بجے تک بند رہیں گی۔ارتھ آور کی مناسبت سے وزیر اعظم آفس کی لائٹس بجھا دی گئیں۔

وزیراعظم عمران خان نے اپنے ایک بیان میں کہا کہ ماحولیات کی بہتری حکومت کی اولین ترجیحات میں شامل ہے ،وزیر اعظم نے  قوم سے اپیل کی کہ صاف اور آلودگی سے پاک ماحول کیلئےحکومت کا بھرپور ساتھ دیں۔

واضح رہے کہ  زمین سے محبت کے اظہار کے لیے پاکستان سمیت دنیا بھر میں آج ’ارتھ آور‘ منایا گیا، جس کے دوران ایک گھنٹے کے لئے تمام غیرضروری بتیاں بجھا دی گئیں۔ ارتھ آور منانے کا مقصد لوگوں میں عوامی  شعور اجاگر کرنا ہے کہ یہ دھرتی ہم سب کی ہے اس کی بہتری کے لیے اقدامات کرنا بھی ہم ہی کی ذمہ داری ہے۔

ارتھ آور کا آغاز 2007 میں آسٹریلیا کے شہر سڈنی سے ہوا  تھا ۔  توانائی کی اس عالمگیر بچت مہم میں حصہ لینے والے 160 سے زائد ممالک میں پاکستان کا حصہ بھی ہے، جہاں ہر سال کی طرح اس سال بھی آج رات ساڑھے 8 سے ساڑھے 9 بجے تک اہم عمارتوں کی غیر ضروری لائٹس بند کردی جائیں گی۔