لاہور میں صبح سویرے موسلا دھار بارش، موسم خوشگوار  

لاہور شہر اور گردونواح میں کہیں تیز اور کہیں ہلکی بارش کے سبب جل تھل ایک ہوگیا ، لاہورکے علاقے کینال روڈ ، گلبرگ، مال روڈ   ، وارث روڈ ، مزنگ ، اچھرہ ، کلمہ  چوک ، لبرٹی مارکیٹ ، شادمان  کے علاقے میں بارش ہوئی ۔ 

محکمہ موسمیات کے مطابق شہر کا درجہ حرارت 25 ڈگری سینٹی گریڈ ریکارڈ کیا گیا۔ لاہور میں اگلے 24 گھنٹوں کے بعد بارش کا سلسلہ وقفہ وقفہ سے جاری رہے گا ۔ 

ایم ڈی واسا غفران احمد کی ہدایات پر واسا کو  الرٹ کردیا گیا ،  نشیبی علاقوں میں ایمرجنسی کیمپس فعال کر دیے گئے ہیں۔ انہوں نے ہدایت کی کہ تمام ایمرجنسی کیپمس پر واسا سٹاف یونیفارم میں ڈیوٹی سرانجام دیتا نظر آئئے ۔

ایم ڈی واسا کاکہنا ہے کہ تمام ڈسپوزل اسٹیشن کو مکمل استعداد پر چلایا جا رہا ہے جبکہ بجلی کے بریک ڈاؤن کی صورت میں جنریٹرز کو اسٹینڈ بائے رکھا گیا ہے۔ ایم ڈی واسا کے مطابق  مون سون کنٹرول روم لمحہ بہ لمحہ مانیٹرنگ کے لیے 24/7 گھنٹے فعال ہے۔ تمام انڈرپاسز پر پانی کے بروقت نکاس کے لیے پمپس آپریشنل ہیں۔

دوسری جانب کراچی میں آج رات بادل جم کر برسنے کا امکان ہے، سلسلہ  18 جولائی تک وقفے وقفے سے جاری رہنے کا امکان ہے۔ 

محکمہ موسمیات نے بلوچستان کےبیشتراضلاع میں تیزہواوں اورگرج چمک کے ساتھ بارش کی پیش گوئی کی ہے ۔  سبی، بولان، ڈیرہ  بگٹی،نصرآباد،جھل مگسی، خضدار، قلات، لسبیلہ ،ژوب ، بارکھان،مکران، تربت، پنجگور،اوران اورگوادر میں تیزاورگرج چمک کےساتھ موسلادھار بارش کی توقع ہے۔