ثمینہ بیگ  کے ٹو سرکرنیوالی پہلی پاکستانی خاتون کوہ پیما بن گئیں 

ثمینہ بیگ کے ٹو سر کرنے والی پہلی پاکستانی خاتون کوہ پیما بن گئیں ، الپائن کلب آف پاکستان نے ثمینہ بیگ کے اس معرکے کی تصدیق کی ہے۔

8611 میٹر بلند کے ٹو دنیا کی دوسری بلند ترین چوٹی ہے ، جسے آج صبح 7 بج کر 42 منٹ پر ثمینہ بیگ نے سر کیا۔

الپائن کلب آف پاکستان کے سیکرٹری کرار حیدر کے مطابقٖ ثمینہ  بیگ نے یہ اعزاز اپنی چھ رکنی ٹیم کے ساتھ حاصل کیا ہے ۔ ان کی ٹیم کے اراکین میں شامل نائلہ کیانی ، عید محمد، بلبل کریم، احمد بیگ، رضوان داد، وقار علی اور اکبر سدپارا بھی کے ٹو سر کرنے میں کامیاب ہوئے ہیں۔

ثمینہ بیگ  2013ء میں دنیا کی بلند ترین چوٹی  ماؤنٹ ایوریسٹ کو سر کرنے کا بھی اعزاز اپنے نام کر رکھا ہے ۔

دوسری جانب وزیراعظم شہباز شریف  نے بھی خاتون کوہ پیما کو اس اعزاز پر سراہا ہے ۔

وزیراعظم شہباز شریف نے مبارکباد پیش کرتے ہوئے  پیغام میں کہا کہ پاکستانی خواتین کوہ پیمائی کے صبر آزما کھیل میں مردوں سے پیچھے نہیں، امید ہے دونوں کوہ پیما دنیا بھر میں پاکستان کا پرچم اسی جذبے سے لہراتی رہیں گی۔

دنیا کی دوسری بلند ترین چوٹی 'کے 2' سر کرنے والی پہلی پاکستانی خاتون کوہ پیما ثمینہ بیگ اور ان کے اہل خانہ کو کامیابی پر مبارک پیش کرتا ہوں۔ ثمینہ بیگ پاکستانی خواتین کے عزم و ہمت اور بہادری کی علامت بن کر ابھری ہیں۔

— Shehbaz Sharif (@CMShehbaz) July 22, 2022

واضح رہے کہ ثمینہ بیگ کو دو مرتبہ اقوام متحدہ کی جانب سے خیر سگالی کا سفیر مقرر کیا جا چکا ہے۔ اس کے علاوہ انھیں حکومت پاکستان کی جانب سے پرائیڈ آف پرفارمنس کا ایوارڈ بھی دیا جا چکا ہے۔