چودھری شجاعت کے فیصلے نے پاکستان کو عمرانی فتنے سے محفوظ کیا:رانا ثناء اللہ

رہنما ن لیگ اور وفاقی وزیر داخلہ رانا ثناء اللہ نے پریس کانفرنس کرتے ہوئے پنجاب اسمبلی میں وزارت اعلیٰ کے انتخاب سے متعلق کہا کہ یہی وہ لمحات تھے جب اللہ تعالیٰ نے ہمیں سرخرو کرنے اور فسادیوں اور عمرانی فتنے کو سرنگوں کرنے کا فیصلہ کیا۔

انہوں نے کہا کہ اتحادی جماعتیں اور تمام کارکنان چودھری شجاعت کے اس فیصلے کو سراہتے ہیں اور خراج تحسین پیش کرتے ہیں، انہوں نے آج ملک میں جمہوریت اور رواداری کو فروغ دیا ہے۔

ان کا کہنا تھا کہ حمزہ شہباز اکثریت حاصل کرکے وزیراعلیٰ پنجاب منتخب ہوئے ہیں، پنجاب کے ضمنی انتخابات میں ہمارے ووٹوں میں اضافہ ہوا ہے جبکہ ہمارے اور تحریک انصاف کے ووٹوں میں معمولی فرق تھا۔

وزیر داخلہ نے کہا کہ 63 اے کے تحت سپریم کورٹ کے لارجر بینچ کے فیصلے کی رو سے پارٹی کی ہدایت کے خلاف کاسٹ کیا جانے والا ووٹ شمار نہیں کیا جائے گا، اور وہ لوگ نااہل بھی ہوں گے، اس فیصلے کا نشانہ 25 لوگ پہلے ہی بن چکے ہیں، ان تمام کا تعلق پاکستان تحریک انصاف سے تھا۔

انہوں نے کہا کہ الیکشن کمیشن اور سپریم کورٹ کا آرٹیکل 63 اے کا فیصلہ موجود ہے جبکہ اسمبلی کی کارروائی کو آئینی تحفظ حاصل ہے اس لیے یہ فیصلہ برقرار رہے گا، ہم پنجاب اور مرکز میں اپنی خدمات جاری رکھیں گے۔